«Eń aldymen, barshańyzdy kele jatqan qasıetti Táýelsizdik kúnimen shyn júrekten quttyqtaımyn! Bul – egemen elimizdiń mártebesin arttyrǵan uly meıram. Biz úshin Táýelsizdikten asqan qundylyq joq. Ony baǵalaı bilý búgingi jáne óskeleń urpaqtyń mindeti. Osy oraıda Elbasy Nursultan Nazarbaevtyń teńdessiz rólin eshqashan umytpaýymyz kerek. Tuńǵysh Prezıdentimiz, memleketimizdiń negizin qalaýshy, tarıhı jáne álemdik deńgeıdegi tulǵa», - dedi Memleket basshysy.
Qazaqstan Prezıdenti Táýelsizdikti nyǵaıtýdyń negizgi joly ekonomıkany kúsheıtip, óndiris kólemin arttyrý ekendigin basa aıtty.
«Sonda ǵana jarqyn bolashaqqa jol ashamyz. Memleket elimizdi damytýǵa atsalysqan bıznes ókilderiniń eńbegin eleýsiz qaldyrmaıdy. Bul rette Tuńǵysh Prezıdentimizdiń bastamasymen ındýstrııalandyrý kúnin atap ótý jaqsy dástúrge aınalǵanyn bilesizder. Elbasy ındýstrıaldyq-ınnovasııalyq damý jolyn otandyq ekonomıkanyń negizgi baǵyty retinde aıqyndady. El ekonomıkasy artqan saıyn memleketimizdiń irgesi de berik bolary sózsiz. Osyǵan oraı kóptegen aýqymdy jumystar atqarylyp otyr. Mańyzdy jobalar qolǵa alyndy. Munyń bári Qazaqstandy damyǵan ozyq 30 eldiń qataryna qosý úshin jasalyp otyr», - dedi Qasym-Jomart Toqaev.
