Memleket basshysy Nursultan Nazarbaev Qazaqstan Respýblıkasynyń Bas prokýrory Ashat Daýylbaevty qabyldady, dep habarlady Prezıdenttiń baspasóz qyzmeti.
Bas prokýror birinshi jartyjyldyqtyń qorytyndylary boıynsha eldegi zańdylyqtyń jaı-kúıi men quqyqtyq tártip týraly habardar etti, sondaı-aq Memleket basshysynyń tapsyrmalarynyń oryndalý barysy jóninde baıandady.
Nursultan Nazarbaev eldegi krımınogendik ahýaldy jaqsartý jónindegi jumysty odan ári jandandyrýǵa, sondaı-aq quqyq qorǵaý organdary qyzmetiniń tıimdiligin arttyrýǵa nazar aýdardy.
Bas prokýror alty aıdyń qorytyndysy boıynsha ashylmaǵan qylmystyń azaıǵany týraly málim etti. Bul rette ol barlyq qylmysty tirkeý naqty kórinisti bilip otyrýǵa jáne anaǵurlym problemaly ýchaskeni anyqtap, ýaqtyly aldyn alý sharalaryn qabyldaýǵa múmkindik týǵyzatynyn atap ótti.
– Birinshi jartyjyldyqta biz 177 myń qylmysty, sonyń ishinde tonaý, usaq buzaqylyq tárizdi qylmys túrlerin tirkedik. Onyń bári esepke alynyp, olar boıynsha tekseris júrgiziledi. Qazirgi ýaqytta aýyr jáne asa aýyr qylmys 16 paıyzǵa azaıǵany, adam ólimi, qaraqshylyq pen tonaýshylyq sany da azaıa bastaǵany atap ótilýde, – dedi A.Daýylbaev.
Buǵan qosa, A.Daýylbaev azamattardyń eńbek quqyqtaryn, jetim balalar quqyqtaryn qorǵaý salalaryndaǵy zańdylyqtyń jaı-kúıi, uıymdasqan qylmysqa, dinı ekstremızm men terrorızmge qarsy is-qımyl jóninde júrgizilgen jumystar, sybaılas jemqorlyq pen bıýdjet qarajatyn urlaý faktileri boıynsha ózekti qylmystyq isterdiń tergelý barysy týraly habardar etti.
Kezdesý qorytyndysynda Memleket basshysy zańdylyq pen quqyqtyq tártipti qamtamasyz etý jónindegi jumysty jalǵastyrýdy, sondaı-aq azamattardyń, shaǵyn jáne orta bıznes ókilderiniń quqyqtaryn, memleket pen qoǵam múddelerin qorǵaýdy kúsheıtýdi tapsyrdy.
