Memleket basshysy Nursultan Nazarbaevtyń atyna M.V.Lomonosov atyndaǵy Máskeý memlekettik ýnıversıtetiniń Qazaqstandaǵy fılıaly túlekterinen ujymdyq hat keldi, dep habarlady Prezıdenttiń baspasóz qyzmeti.
О́z hatynda MMÝ fılıalynyń dıplomyn alǵan túlekter Qazaqstan Prezıdentine rızashylyqtaryn bildirip, álemdegi úzdik ýnıversıtetterdiń birinde bilim alýǵa múmkindik jasaǵany úshin alǵys aıtady.
«Sizdiń bastamańyzben Astanada MMÝ-diń Qazaqstandaǵy fılıaly ashylýynyń arqasynda biz tereń bilim alǵanymyz úshin Sizge rızamyz. Bul bizdiń aldymyzdan elimizdiń ıgiligi úshin qyzmette óz qabiletimizdi júzege asyrý úshin, sol arqyly el ómiri men damýynda laıyqty ornymyzdy tabýǵa mol múmkindikter ashady», – delingen hatta.
Hat ıeleri Memleket basshysynyń qyzmeti el ıgiligine, sondaı-aq Qazaqstan men Reseı arasyndaǵy dostyqty nyǵaıtýǵa baǵyttalǵanyn atap ótken.
«Bizdiń oqý ornyn bitirip shyǵýymyz – Sizdiń budan 20 jyldaı buryn Máskeý ýnıversıtetinde jarııa etken Eýrazııa qaǵıdattaryn iske asyrýdyń taǵy bir mysaly», – dep atap ótedi túlekter.
Hatta 2013 jyly oqý bitirýdiń aıryqsha ekenine, óıtkeni, elordanyń 15 jyldyǵyn merekeleýmen tuspa-tus kelgenine de toqtalǵan. MMÝ-diń Qazaqstandaǵy fılıalynyń qurylýy men qalyptasýy – Astana tarıhynyń ajyramas bóligi.
Sońynda hat ıeleri Qazaqstan Prezıdentiniń senimin aqtaýǵa jáne elimizdiń ósip-órkendeýine laıyqty úlesterin qosýǵa umtylatyndary týraly málimdeıdi.
