Rýhanııat • 16 Jeltoqsan, 2019

Bilikti mamandar tájirıbesin arttyrý memorandýmyna qol qoıdy

56 ret kórsetildi

Táýelsizdik merekesine oraı ótken saltanatty sharada Ulttyq memlekettik kitap palatasy men ál-Farabı atyndaǵy QazUÝ jýrnalıstıka fakýltetimen aradaǵy memorandýmǵa qol qoıyldy. Mańyzdy qujatqa sáıkes  jýrnalıstıka fakýltetiniń  baspagerlik-redaktorlyq jáne dızaınerlik óner kafedrasynyń stýdentteri Kitap palatasynda tegin óndiristik tájirıbeden ótip, úzdik oqyǵan stýdentterdiń jumysqa ornalasýy  qarastyrylǵan.

Búginde bilikti mamandar daıarlaýda óndiristik tájirıbeniń salmaǵy basym. Osy turǵydan alǵanda elimizde shyǵatyn barlyq baspa basylymdarynyń mindetti danasyn tirkep, onyń statıstıkasyn, bıblıografııalyq kórsetkishin jasap, syny men syryn buzbaı keler urpaqqa jetkizýdi maqsat etip otyrǵan qara shańyraqta 20-30 jyl eńbek ótili bar tájirıbeli de, bilikti bıblıograftar qyzmet etip keledi.

Saltanatty sharany ashyp, izgi tilegin bildirgen Ulttyq memlekettik kitap palatasynyń dırektory Ádil Qoıtanov «Elimizdiń jastary táýelsizdik tartý etken múmkindikterdi paıdalanyp, bilimdi de bilikti maman bolyp qalyptasýy kerek. Soǵan negizdelgen sharanyń biri eki ulttyq ujymnyń búgingi birlesken memorandýmy. Bizde osy salada tájirıbeli de, bilikti bıblıograftar qyzmet etedi. Mine, stýdentter teorııalyq bilimderin óndiristik tájirıbeden ótkende osy mamandardan úırense, erteńgi jumystarynda ıgilikterine aınalary anyq» dep atap ótti.

Al óz kezeginde jýrnalıstıka fakýltetiniń dekany Saǵatbek Medeýbekuly jınalǵandardy táýelsizdik merekesimen quttyqtaı kele «Biz daıyndap otyrǵan jastar elimizdiń bolashaǵy. Olardyń kúni erteń jumysqa ornalasýy úshin sizder sekildi ujymdarmen erte bastan baılanys ornatýdamyz. Jumys berýshilerge qandaı mamandar qajet, olardy qaı baǵytta daıyndaýymyz kerektigin zertteýdemiz. Sondyqtan táýelsizdik merekesi qarsańynda ótip otyrǵan búgingi sharanyń mańyzy óte joǵary» degen oılaryn ortaǵa saldy.

Saltanatty shara barysynda Kitap palatasy dırektorynyń orynbasary Tolqyn Turǵalıqyzy stýdent jastarǵa óz tájirıbesin jan-jaqty úıretetinin jetkizse, dırektordyń orynbasary, aqyn Maraltaı Raıymbekuly óz quttyqtaýyn jyrmen arnady. Aqyn Almasbek Ahmetbekuly da tilegin belgili «Kók týdyń jelbiregeni» óleńimen jetkizip, júrek jardy lebizin bildirdi.

 ALMATY

Sońǵy jańalyqtar

Sora ekken turǵyn tergelýde

Aımaqtar • Keshe

Uqsas jańalyqtar