«Altyn dombyra» saıysy byltyrǵy VII «altyn dombyranyń» ıesi Jansaıa Mýsınanyń qurmetine Oral qalasynda tuńǵysh ret ótip otyr. «Nur Otan» partııasynyń qoldaýymen, Qazaqstan Respýblıkasy Mádenıet jáne sport mınıstrligi jáne Batys Qazaqstan oblysy ákimdiginiń uıymdastyrýymen qolǵa alynǵan aqyndar aıtysy eki kúnge, 16-17 jeltoqsanǵa josparlanǵan.
Aıta keteıik, bul jolǵy «Altyn dombyra» saıysynyń uıymdastyrylýy erekshe boldy. Ásııa Berkenova, Álpııa Ormanshına, Qanysha Raıysova, Darıǵa Mushtanova, Qýanysh Maqsutov, Amanjol Áltaev t.b. aıtys ardagerleri de shaqyrylyp, eki kún boıy aıtys óneriniń ótkeni men bolashaǵyn saralap, usynys, oı-pikirlerin ortaǵa saldy. Meımandar Oraldyń tarıhı oryndarymen tanysyp, aldaǵy alamanǵa daıyndaldy.
«Nur Otan» partııasy Batys Qazaqstan oblystyq fılıalynyń keń zalynda ótken «Altyn dombyra» aıtysy jaǵymdy jańalyqpen bastaldy. Aqyndar men kórermen qaýymdy merekemen quttyqtaǵan óńir basshysy Ǵalı Esqalıev Qazaqstan Respýblıkasy Prezıdenti Qasym-Jomart Toqaevtyń Jarlyǵyn oqyp, aıtys ardageri Júrsin Ermannyń «Parasat» ordenimen, aqyn Aıbek Qalıevtiń «Qurmet» ordenimen marapattalǵanyn jetkizdi.
Bul basqosýǵa «Nur Otan» partııasynyń hatshysy Ǵabıdolla Ospanqulov, Qazaqstan Respýblıkasy Mádenıet jáne sport vıse-mınıstri Nurqısa Dáýeshov, Batys Qazaqstan oblysy ákiminiń orynbasary Serik Egizbav, «Nur Otan» partııasy BQO fılıaly tóraǵasynyń birinshi orynbasary Murat Muqaev qatysty. Aıtystyń qazylar alqasyn aqyn, memlekettik syılyqtyń laýreaty Nesipbek Aıtuly basqaryp, quramyna Ásııa Berkenova, Qoılybaı Asanov, Darıǵa Mushtanova, Amanjol Áltaev, Muhamedjan Tazabek, Janarbek Áshimjan, Rıga Ońaeva, Baýyrjan Halıolla syndy belgili aqyndar endi.
Sonymen, 16 jeltoqsan kúni tún ortasyna deıin sozylǵan irikteý saıysynda alǵashqy jupta aıtysqan Jandarbek Bulǵaqov (Nur-Sultan) - 85 upaı, Jansaıa Mýsına (Oral) -87 upaı ıelendi. Ekinshi juptaǵy Serik Qusanbaev (О́skemen) – 83 alsa, onyń qarsylasy Aıbek Qalıev (Arqalyq) – 88 upaımen alǵa shyqty. Úshinshi jup ıeleri Bekzat Asqarov (Nur-Sultan) – 82, Ásem Erejeqyzy (Nur-Sultan) – 90 upaı jınady.
IV jup: Aspanbek Shuǵataev (Pavlodar) – 88, Shuǵaıyp Sezimhan (Almaty) – 85.
V jup: Qanat Myrzahan (Taraz) – 87, Arýna Kerimbek (Aqtóbe) – 84.
VI jup: О́mirjan Kópbosynov (Qaraǵandy) – 90, Juldyzaı Maratbekqyzy (О́skemen) – 82.
VII jup: Qaziret Berdihan (Almaty) – 87, Birjan Baıtýov (Túrkistan) – 86.
VIII jup: Rústem Qaıyrtaı (Almaty) – 90, Talǵat Myqı (Oral) – 82.
IX jup: Baýyrjan Shermıdenuly (Oral) – 86, Dıdar Qamıev (Qaraǵandy) – 86.
H jup: Muhtar Nııazov (Qyzylorda) – 90, Shalqarbaı Izbasarov (Atyraý) – 82.
Aıtystyń fınaldyq básekesi búgin, ıaǵnı 17 jeltoqsan kúni saǵat 15.00-de «Nur Otan» zalynda jalǵasady.
Batys Qazaqstan
