Sonymen buǵan deıin Qazaq sırki «Er Tóstik» baǵdarlamasyn ázirlep, kishkentaı kórermenderiniń rııasyz qoshemetine bólengen bolatyn
«Sırk óneri de el ómiriniń bir bólshegi. Sońǵy ýaqytta rýhanı jańǵyrý degen sózdi kóp aıtamyz. Bul baǵdarlama bizdiń jańa ıdeıalarymyzǵa túrtki boldy. Nátıjesinde sırk «Er Tóstikti» oıatyp, jańa qyrynan jańǵyrtty. Lazerlik shoýdyń kúshimen zulymdyq pen qaıyrymdylyqtyń arasyndaǵy tartysty kórsetýge qol jetkizdik dep oılaımyn», – degen bolatyn «Qazaq memlekettik sırki» KMQK dırektory Baqyt Bókebaev.
Al búgin sol Qazaq memlekettik sırkiniń ónerpaz ujymy Teodor Amadeı Gofmannyń «Shelkýnchık jáne Tyshqan patshasy» ertegisiniń jelisi boıynsha qoıylatyn merekelik baǵdarlamalaryn bastaıdy.
2019 jyldyń 17 jeltoqsany men 2020 jyldyń 12 qańtar aralyǵynda júretin «Shelkýnchık jáne Myshılda» baǵdarlamasy balalardy ǵana emes, eresekterdi de ertegiler álemine saıahat shektiretini sózsiz.
Jańa baǵdarlama aty aıtyp turǵandaı, Petr Ilıch Chaıkovskııdiń «Shelkýnchık» atty ataqty baletiniń mýzykasy negizinde qoıylady.
Drosselmeıer, Shelkýnchık, Marı, Frıs, Myshılda, tyshqan patshasy, Aıaz ata, Aqshaqar atty keıipkerlerdi bul joly áýe gımnastary, akrobattar, ekvılıbrıster oryndaıdy. Úıretilgen janýarlar men belgili kloýnessa Oksana Neskladnaıanyń eń eksklıýzıvti reprızalaryn (Úlken Máskeý sırki, Máskeý qalasy) da ornymen tabýǵa bolady.
Ǵajaıyp qórinisterdi Qazaq memlekettik sırkiniń áıgili balet toby súıemeldeıdi.
Sırktiń jańa baǵdarlamasy, teatr, mýzyka jáne horeografııalyq ónerlerdiń úzdik dástúrleriniń jıyntyǵy. Shyǵarmashylyq top tek qana kórermenniń kóńil-kúıin kóterý ǵana kózdemeıdi, sonymen qatar bul qoıylymnyń tárbıelik máni de zor. Arnaıy osy baǵdarlamaǵa arnap, jańa sırktik nomerler qoıyldy, mýzyka jazyldy, jańa kostıýmder tigilip, rekvızıttar daıyndaldy.
Baǵdarlama úlken aýqymdaǵy lazerlik shoýmen qamtylǵan.
Búgin Almatynyń mádenı ómirindegi aıtýly oqıǵaǵa oraı, «Qazaq memlekettik sırki» KMQK dırektory Baqyt Bókebaev, qoıýshy-rejısser Marına Redko, Halyqaralyq festıvalderiniń laýreaty jáne jeńimpazy sırk óneriniń artısi kloýnessa Oksana Neskladnaıa, «Beldiktegi áýe gımnastary» nomeriniń jetekshisi, QR eńbek sińirgen mádenıet qaıratkeri Qurmanǵalı Dosbatyrov jáne jas debıýtant (4 jas), áýe gımnasty, Dosbatyrov sırk áýletiniń ókili Danat Dosbatyrov, «Nomad» Atty-akrobatıkalyq nomeriniń artısi Marıam Sataeva, Halyqaralyq sırk óneri festıvalderdiń laýreaty, áýe gımnasty Anastasııa Demıdovalar jýrnalıstermen kezdesip, suqbattasty.
