Taraz qalasyndaǵy «Balasaǵun» ortalyq konsert zalynda Jambyl oblysynyń ákimi Asqar Myrzahmetovtiń qatysýymen Táýelsizdik kúnine oraı salnatatty jıyn ótti. Asqar Myrzahmetov saltanatty sharada baıandama jasap, Táýelsizdik taǵylymyna toqtaldy. Sonymen qatar, kópshilikke bardyń baǵasyn baǵalaı bilýdiń mańyzdylyǵyn jetkizip, osy jyldar ishinde aımaqta atqarylǵan aýqymdy jumystar barysyn da áńgimeledi.
Budan keıin Qazaqstan Respýblıkasynyń Prezıdenti Qasym-Jomart Toqaevtyń Jarlyǵymen eldiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin nagradtalǵan birqatar azamattarǵa marapattary tabystaldy. Prezıdenttiń Jarlyǵymen jazýshy, respýblıkalyq «Jambyl» jýrnalynyń bas redaktory Nesipbek Dáýtaıuly, «Qazfosfat» jaýapkershiligi shekteýli seriktestigi Jambyl fılıaly bas ınjeneriniń orynbasary Aleksandr Malysh, aqyn, eńbek ardageri Shyryn Mamaserikova, oblys ákimi apparatynyń basshysy Rústem Dáýlet, «Tarazenergoortalyq» aksıonerlik qoǵamynyń basqarma tóraǵasy Baqbergen Máýlenov, Moıynqum aýdanynyń ákimi Máden Musaev, «Meıirim» medısınalyq ortalyǵynyń dırektory Gúldara Nurymova, oblystyq energetıka, turǵyn úı-kommýnaldyq sharýashylyq basqarmasynyń basshysy Nurlan Aldamjarov, oblystyq mádenıet, arhıvter jáne qujattama basqarmasy basshysynyń orynbasary Sara Mádıeva «Qurmet» ordenimen marapattaldy. Al, «Qazfosfat» jaýapkershiligi shekteýli seriktestiginiń «Mıneraldy tyńaıtqyshtar» zaýytynyń №01 sehynyń slesar-jóndeýshisi Jeksen Ákijanov pen «Jambyl elektr júıesi» jaýapkershiligi shekteýli seriktestigi fılıalynyń Krasnogor taratý elektr júıesiniń elektroslesari Edýard Shtark III-dárejeli «Eńbek Dańqy» ordenimen marapattaldy. Bul nagradany Nur-Sultan qalasynda Memleket basshysynyń óz qolynan alǵandar arasynda Taraz qalasynyń turǵyny, «Qazaqstan temir joly-Júk tasymaldaý» aksıonerlik qoǵamynyń «Jambyl júk tasymaldaý bólimshesi» Jambyl paıdalaný lokomotıv deposynyń vagon qaraýshy-jóndeýshisi Nıkolaı Homýtenkonyń da bar ekenin aıtyp ótý kerek. Sondaı-aq, Taraz qalasynyń turǵyny, «Aınury» tatar-bashqurt mádenı ortalyǵy» qoǵamdyq birlestiginiń tóraǵasy Amır Halıkov II dárejeli «Dostyq» ordenimen, Kenen Ázirbaev atyndaǵy Jambyl oblystyq fılarmonııasynyń ánshisi Baqyt Shaǵyrbaev «Qazaqstannyń Eńbek sińirgen qaıratkeri» ataǵymen Nur-Sultan qalasynda marapattalǵan.
Jıynda ózge de birqatar azamattarǵa «Eren eńbegi úshin», «Shapaǵat» medaldari, Qazaqstan Respýblıkasynyń «Qurmet» gramotalary, Qazaqstan Respýblıkasy Prezıdentiniń Alǵys haty jáne «Barys» tósbelgisi tabystaldy. Shara sońy jergilikti ónerpazdardyń konserttik baǵdarlamasymen jalǵasty.
Jambyl oblysy
