Jarma aýdanynyń jurtshylyǵy bıyl Táýelsizdik merekesin erekshe kóńil-kúımen qarsy aldy. Ulyq mereke qarsańynda aýdan ortalyǵy – Qalbataý aýylynda eki páterli 5 turǵyn úı paıdalanýǵa berildi.
Bul baspanalar kóp balaly analar men múgedek jandary bar otbasylarǵa saltanatty túrde tabys etildi. Turǵyn úılerdi «Nurly jer» baǵdarlamasy boıynsha jeke kásipker Dınara Isabaeva salǵan eken.
Taǵy bir jaǵymdy jańalyq, 13 jeltoqsanda Belterek aýylynda jóndeýden ótken Mádenıet úıi saltanatty túrde ashyldy.
Jıyrma jyldaı qaraýsyz qalǵan ǵımaratty qaıta qalpyna keltirýge aýdandyq bıýdjetten 7 mıllıon teńgeden astam qarjy bólinipti.
«Táýelsizdiktiń 28 jyldyǵyn laıyqty qarsy alý maqsatynda aýdanda birqatar ıgi ister júzege asyryldy. Elimizdiń basty merekesin Belterek aýyly turǵyndary erekshe yqylaspen qarsy aldy. Mádenı sharalardyń otaýynan 20 jyldaı qol úzip qalǵan aýyl turǵyndary osy óńirge jasaǵan saparym barysynda atalmysh máseleni kótergen bolatyn.
Aýyl aqsaqaldary men aq jaýlyqty analar Mádenıet oshaǵynyń tusaýyn kesip, aýdandyq Mádenıet úıiniń ónerpazdary konserttik baǵdarlama usyndy. Osyǵan deıin aýdan boıynsha jergilikti jerlerde 19 klýb jumys istep turǵan bolsa, búgin olardyń qatary taǵy bir klýbpen tolyǵyp otyr. Keleshekte osy baǵyttaǵy jumystardy jalǵastyryp, aýdan ortalyǵynan shalǵaı jatqan eldi mekenderge mán beriletin bolady» deıdi Jarma aýdanynyń ákimi Ahmetqalı Nurǵojın.
Shyǵys Qazaqstan oblysy,
Jarma aýdany
