Zamanynda Jetisýdaǵy qant óndirisiniń negizgi úlesin quraǵan zaýyttyń biri osy Qarabulaq aýylynda ornalasqan edi. Qazir óndiris jumys istemeıdi. Kezinde salynǵan ǵımarattar endi áleýmettik máselege arqaý bolyp tur. Mysaly, qant zaýytynyń jumysshylaryna arnalǵan 30 páterli turǵyn úı 1990 jyldan beri qaraýsyz tur. Qazir barlyq ınjenerlik jeliler ajyratylǵan. Biraq, aýdan ákimdigi bul kóp qabatty úıge kúrdeli jóndeý júrgize almaı otyr. Sebebi, ǵımarat ıesiz dep tanylmaǵanymen, páter ıeleriniń qolynda zańdy qujat bary kedergi bolýda. Al menshik egeleri ákimdiktiń talabyna moıynusynar emes. Másele boıynsha birneshe ret sot otyrysy ótkenimen, is naqty sheshimin tapqan joq.
Al osy aýyldyń baıyrǵy turǵyny Elena Velıkaıa ortalyq káriz júıesiniń tozyp ketkenin aıtady.
- Káriz júıesinen shyqqan aǵyndy sý jyl boıy Japsarbaev kóshesiniń boıymen qant zaýytynyń fıltrleý alqabyna deıin aǵyp jatady. Jaǵymsyz ıis jer-kókti alyp ketedi. Bul máseleden oblys ákimine deıin habardar. Bizge jobalyq-smetalyq qujat daıyndaýǵa bıýdjettik tapsyrys berilgenin aıtqan, tek káriz júıesiniń kúrdeli jóndeýi tezirek bastalsa eken, - deıdi aýyl turǵyny.
