Jolaýshylar túsip jatqanda onyń tusaýkeseri jasalyp, qyzyl lentany oblys ákimi Arhımed Muhambetov pen FlyArystan kompanııasynyń marketıng jáne satý jónindegi dırektory Janar Jaılaýova kesti. Qostanaıǵa elordadan ushaqpen 180 jolaýshy ushyp keldi. О́te jaıly kólikke rahmetin aıtyp jatty.
«Bul bıýdjettik kompanııa ekenin bilesizder. Jolaýshylarǵa qolaıly tarıf bolady. Nursultan qalasyna Qostanaıdan eń kóp degende 6 myń teńgemen jetedi ári jyldam. Eki qalanyń ortasyna baryp-kelý nábári 12 myń teńge shamasynda bolady. Bul óte tómen baǵa. Bul jerde árıne, eń bastysy sapa bolyp tabylady» dedi Arhımed Begejanuly.
Janar Jaılaýova osy kompanııanyń reısteri ashylǵaly Qazaqstanda jolaýshylar tasymaly 30 paıyzǵa artqanyn aıtty.
«Aldaǵy ýaqytta Qostanaıdan basqa qalalarǵa da baǵyttar ashylýy múmkin. Ol úshin oblys ákimshiligimen tyǵyz jumys isteıtinimizge úmittimiz. Shyǵyny tómen bolsa, bılet baǵasynyń quny da tómendeıdi» dedi Janar Jaılaýova.
Qolaıly ári arzan kólik qostanaılyqtardyń nazaryn birden aýdarsa kerek. Oblys ákiminiń aıtýyna qaraǵanda, jeltoqsan aıynyń sońyna deıin barlyq bılet satylyp ketken. Arhımed Muhambetov kompanııa basshylyǵyna rahmetin aıtyp, olarmen aldaǵy ýaqytta yntymaqty jumys isteýge oblystyń daıyn ekenin de jetkizdi.
«Ushaqtyń qatynaýyna sapaly qyzmet kórsetý basty mindetimiz bolyp tabylady. Bıyl Qostanaı áýejaıynyń ushý-qoný jolaqtary jańǵyrtyldy. Uzyndyǵy 2 shaqyrym 500 metrden 2 shaqyrym 800 metrge jetkizildi, eni 45 metrden 60 metrge keńeıtildi. Endi 200 tonnaǵa deıingi áýe kemelerin qabyldaı beredi. Soǵan oraı jabdyqtar da jańartyldy» dedi Arhımed Begejanuly.
Oblys ákimi kelesi jyly áýejaıdyń ózi jóndeletininen de habardar etti. Termınal keńeıtilip, jolaýshylardy qabyldaýǵa, shyǵaryp salýǵa barlyq jaǵdaı zamanaýı deńgeıge jetkiziletin bolady.
