Qazaqstan • 18 Jeltoqsan, 2019

Áskerı mamandyqtyń úzdik ókilderi marapattaldy

292 retkórsetildi

Birinshi ret ótkizilgen «Ásker tarlany» saıysynyń jeńimpazdaryn Ulttyq áskerı-patrıottyq ortalyǵynda  marapattady. Baıqaý oqý jylynyń qorytyndysy boıynsha Qazaqstan Qarýly Kúshteriniń úzdik áskerı qyzmetshilerin anyqtaýǵa baǵyttalyp, Táýelsizdik kúnine oraılastyrylǵan. Bul týraly Qorǵanys mınıstrliginiń baspasóz qyzmeti habarlady.

Úmitkerlerdi irikteý tórt kezeńde ótkizildi. Olar áskerı bólimder men mekemelerde, óńirlik qolbasshylyqtar men ásker tekterinde, ásker túrleri men Qarýly Kúshter aýqymynda. Jaýyngerlik eńbekteri «Ásker tarlany» júldesine laıyqty dep tanylǵan áskerı qyzmetshiler elimizdiń túrli óńirlerinen tańdalynyp alynǵan.

Sonymen qatar irikteý kezinde jaýyngerlik daıarlyq boıynsha aı saıynǵy baqylaý sabaqtarynyń, baqylaý jáne qorytyndy tekserýlerdiń nátıjeleri, áskerı qyzmetshiniń jaýyngerlik jáne memlekettik-quqyqtyq daıarlyq is-sharalaryna belsendi qatysýy, onyń qyzmettik sıpattamasy, tártiptik jazalardyń jáne ákimshilik quqyq buzýshylyqtardyń bolmaýy, moraldyq-iskerlik qasıetteri, sondaı-aq psıhologııalyq turaqtylyq deńgeıi eskerildi.

18 áskerı mamandyq boıynsha úzdik áskerı qyzmetshiler anyqtaldy. Bir júlde ótken jyly jaýyngerlik daıarlyq nátıjelerinde eń joǵarǵy nátıjege qol jetkizgen kishi serjant Esbolat Ýsnatdınovqa berildi.

Áskerı qyzmetshi jaýyngerlik mashına ekıpajyn basqaryp, óziniń qyzmettesterine úlgi bola alady. Úzdik ushqysh Armııa halyqaralyq oıyndarynyń birneshe márte jeńimpazy, aýqymdy oqý-jattyǵýlardyń qatysýshysy avıasııalyq eskadrılıa komandıri maıor Ermek Muhanov atandy.

9

Sońǵy ýaqytta Áskerı-teńiz kúshterinde bólimshesi aldyńǵy qatarda kóringen mınalyq-tartqysh korabldiń komandıri 3-shi dárejeli kapıtan Medet Sultanov úzdik teńizshi júldesine ıe boldy. Qazaqstandyq áskerde úzdik mergen ataǵy, turaqty túrde halyqaralyq saıystar men oqý-jattyǵýlarynda óziniń sheberlegin dáleldep júrgen serjant Bektoraz Nursultanǵa berildi. Barlaý-izdestirý áreketterin sheber meńgergen jáne qol astyndaǵylardy úırete bilgen 3-shi synypty serjant Ázız Syndarqulov úzdik barlaýshy dep tanyldy.

Bitimgershilik mıssııa quramynda beıbitshilik pen qaýipsizdikti qoldaý boıynsha mindetterdi úlgili oryndaǵany úshin «Jyl bitimgeri» nomınasııasy boıynsha kapıtan Arman Tastanbekov jeńimpaz atandy. Ol Chehııa men Úndistanda bitimshilerdi daıarlaý kýrsynan ótti, BUU-nyń Lıvan mıssııasyna jiberer aldynda úshinshi qazaqstandyq bitimgershilik rotasyn daıyndaýǵa qatysty, beıbitshilik pen halyqaralyq yntymaqtastyqty nyǵaıtýǵa qosqan úlesi úshin marapattary bar.

Aýmaqty mınadan tazartýǵa baılanysty, bilgir jáne jankeshti áreketi úshin úzdik saper retinde ınjenelik-saperlik vzvodtyń aǵa serjanty Jánibek Bekjanov tanyldy. Jaýyngerlik daıarlyq pen tapsyrylǵan qarý-jaraqtyń jaýapty saqtaǵany úshin serjant Eldar Turaqbaıdyń eńbegi joǵary baǵalandy. Qarý-jaraq komandıri úzdik artıllerıst dep tanyldy.

9

Eń úzdik baılanysshy Armııalyq halyqaralyq oıyndardyń «Senimdi qabyldaý» baıqaýynyń jeńimpazy, radıopelengasııa boıynsha eń úzdik maman, radıostansııa bastyǵy kishi serjant Dıdar Seısenbaev boldy. Sondaı-aq, marapattalýshylardyń qatarynda eńbegi baıqala bermeıtin, alaıda onsyz áskerdi elestetý múmkin emes maman ıeleri de boldy. Olar: materıaldyq-tehnıkalyq qamtamasyz etý mamany, áskerı polısııa qyzmetkeri, áskerı dáriger, sportshy, baılanysshy, Áýe shabýylyna qarsy qorǵanys salasynyń mamany, tárbıeshi-ofıser jáne oqytýshy.

Aıta ketken jón, qorǵanys vedomstvosy basshylyǵynyń sheshimi boıynsha konkýrs jyl saıyn úzdik áskerı mamandardy anyqtaý jáne kótermeleý, sondaı-aq áskerı qyzmetke qajetti daǵdylardy arttyrý úshin ótkiziledi.

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar