Jeke tulǵalar men jeke kásipkerlerdiń salyq tóleý prosesin jeńildetý úshin júrgizilgen jumys nátıjesinde 2020 jyldyń 1 qańtarynda «Salyq ámııany» tetigi iske qosylady. Bul – bir shottan tólem qabyldaý jáne óńdeý qyzmeti, salyq tóleýshiniń ótinishinsiz onlaın rejimde esepke alý júıesi. Is-shara barysynda «Salyq ámııanynyń» jumysymen Qarjy vıse-mınıstri Rýslan Eńsebaev tanystyrdy.
«Kóptegen azamat salyq tóleýde qıyndyqtarǵa tap bolady. Mysaly, salyq tóleýshi ózine qajet myńnan astam derektemeniń tórteýin – BSK, STK, benefısıardyń BSN jáne somasyn kórsetýi kerek edi. Olardyń bireýiniń durys kórsetilmeýi bıýdjetke tólemniń durys aýdarylmaýyna, sáıkesinshe aıyppul men ósimpulǵa sebep bolatyn. Endi Qarjy mınıstrliginiń júıeli jumysynyń arqasynda salyqty balama túrde «Salyq ámııanyn» toltyrý arqyly tóleýge bolady. Bul qyzmet salyq tóleýshige onyń aǵymdaǵy jáne aldaǵy bıýdjettik mindettemeleri týraly aqparat beredi. Salyq tóleýdiń derektemeleri salyq tóleýshi kórsetpeı-aq avtomatty túrde toltyrylady, bul salyqtyń kepildi jetkizilýin qamtamasyz etedi», dedi R.Eńsebaev.
«Salyq ámııanynyń» mobıldi nusqasy Memlekettik kirister komıtetiniń e-Salyq mobıldi qosymshasynyń platformasynda jumys isteıdi. egov.kz portalynda, jeltoqsan aıynyń sońynan bastap «Qazaqstan Halyq Banki» AQ mobıldi qosymshasynda, 2020 jyldan bastap Kaspi.kz mobıldi qosymshasyna da engiziletin bolady.
Qarjy mınıstrligi mán berip otyrǵan basymdyqtardyń biri – qoǵam men bıznesti sapaly memlekettik qyzmettermen qamtamasyz etý jáne barynsha ashyq qyzmet etý. Osyǵan oraı «Sıfrly Qazaqstan» memlekettik baǵdarlamasy aıasynda qyzmetterdi Open API formatyna engizý, sonymen qatar salyq tóleý tártibin jeńildetetin qyzmetterdi qurý boıynsha kóptegen jumystar atqarylýda.
Búgingi tańda elektrondy memlekettik satyp alý veb-portaly arqyly málimetterdi berý boıynsha 60-tan astam memlekettik qyzmet engizildi. «Elektrondy qarjy ortalyǵy» AQ Basqarma tóraǵasynyń orynbasary Darhan Birjanov elektrondy memlekettik satyp alý portalynyń jáne «Ashyq bıýdjet» qyzmetteriniń biryńǵaı qyzmeti týraly aıtty.
«Qazir Elektrondy memlekettik satyp alý portalyna 160-tan astam uıym tirkelgen. Júıede tapsyrys berýshilerdiń taýar jetkizýge, jumysqa, qyzmetke suranysy, satyp alý prosedýralary, elektrondy kelisimsharttar jasaý jáne olardyń oryndalýy týraly málimetter jarııalanady», dedi D.Birjanov.
Qazirgi ýaqytta ekinshi deńgeıli bankter, IT-naryq ókilderi osy API qyzmetterine qol jetkizdi. Olar API derekterine negizdelgen jeke jáne zańdy tulǵalardyń Qarjy mınıstrliginiń qurylymdyq bólimshelerimen ózara árekettesýin jeńildetýge kómektesetin jańa qyzmetter usynbaq.
