Kezdesýde «Qazaq balyq sharýashylyǵy» ZTB atqarýshy dırektorynyń mindetin atqarýshy Serik Temirhanov balyq ósirýmen aınalysatyn kásipkerler men fermerlerdiń negizgi máselelerine nazar aýdardy. Olardyń qatarynda balyq ónimderi aınalymynyń esepke alynbaǵan kóleminiń aýqymy, shıkizat tapshylyǵy, sýda ósirýdi damytý deńgeıiniń tómendigi, eksport aıasynyń tarlyǵy, ǵylymı-zertteý ınstıtýttarynyń saladaǵy ózekti máselelerden alshaqtyqtyǵy bar.
S.Temirhanov aýyl sharýashylyǵy mınıstrligi tarapynan salany ákimshilendirýdiń jetispeýshiligine nazar aýdardy, onyń aıtýynsha, «elimizdiń aýyl sharýashylyǵy ındýstrııasyndaǵy balyq sharýashylyǵynyń róli týraly túsinik álsiz bolyp otyr».
Sala ókilderiniń baǵalaýy boıynsha, balyq ónimderi aınalymynyń 70 paıyzy zańdy bazardan syrt qalyp, «kóleńkeli sektordan» oryn alǵan. S.Temirhanov balyq pen balyq ónimderin sharýashylyqtardan dúken sórelerine deıin qadaǵalaý júıesin engizý jaǵdaıdy jaqsarta alar edi dep esepteıdi.
Senat Tóraǵasy D.Nazarbaeva jumys kezdesýleriniń qorytyndysy boıynsha Agrarlyq máseleler, tabıǵatty paıdalaný jáne aýyldyq aýmaqtardy damytý komıtetine aýyl sharýashylyǵy ónimderin óndirýshilerdiń ókilderi kótergen ózekti máselelerdi zerdeleýdi jáne olardy 2020 jylǵa josparlanǵan parlamenttik tyńdaýlarda talqylaýǵa daıyndaýdy tapsyrdy.
