Parlament • 19 Jeltoqsan, 2019

Senatorlar ishki qajettilikterge baǵyttalǵan zań jobasyn qarady

14 ret kórsetildi

Ekonomıkalyq saıasat, ınnovasııalyq damý jáne kásipkerlik komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine jer qoınaýyn paıdalaný, gaz jáne gazben jabdyqtaý máseleleri boıynsha ózgerister men tolyqtyrýlar engizý týraly» zań jobasy qaraldy. Bul týraly Parlament Senatynyń baspasóz qyzmeti habarlady.

Zań jobasy gaz jáne gazben jabdyqtaý salasyndaǵy zańnamany odan ári jetildirý, elimizdiń gazǵa degen ishki suranysyn turaqty qamtamasyz etý úshin sharttardy yntalandyrý, gazdy shıkizat retinde qoldanatyn jańa ınvestısııalyq jobalardy tartý jáne iske asyrý maqsatynda ázirlendi.

Qujatpen birqatar zań jobalaryna ózgerister men tolyqtyrýlar engiziledi.

Zań jobasymen jer qoınaýyn kómirsýtegiler boıynsha paıdalaný quyǵyn berýge aýksıon ótkizý tetikterine ózgerister engiziledi. Zań jobasy qabyldanǵan soń aýksıondy komıssııa emes, operator elektrondyq nysanda ótkizedi. Bul rette aýksıon jeńimpazyn taný jáne oǵan kómirsýtegiler boıynsha jer qoınaýyn paıdalaný quqyǵyn berý fýnksııasy komıssııada saqtalady. Sondaı-aq kómirsýtegiler boıynsha jer qoınaýyn paıdalaný quqyǵyn berýge arnalǵan elektrondyq aýksıondar operatorynyń qyzmeti retteledi.

Elimizdiń ishki naryǵyn turaqty gazben jabdyqtaýdy, sondaı-aq gaz baǵasynyń deńgeıin qamtamasyz etý úshin zań jobasy qabyldanǵan soń elektr energııasy óndirisine otyn retinde taýarlyq gazdy paıdalanatyn jańa strategııalyq mańyzdy ınvestısııalyq jobalar men jańadan iske qosylǵan elektr stansııalary úshin taýarlyq gazǵa shekti baǵa gaz jetkizýdiń ózindik qunynan jáne jeti paıyzdy quraıtyn ulttyq operatordyń rentabeldiliginiń eń tómen normasynan qalyptastyrylatyn bolady.

Sonymen qatar zań jobasymen tabıǵı gazdyń otyny retinde paıdalanylýyn keńeıtýge jáne tıimdiligin arttyrýǵa baǵyttalǵan erejeler engiziledi.

Zań jobasymen ýákiletti organdardyń munaı-hımııa ónimderin óndirý jónindegi ınvestısııalyq jobalardyń tizbesin, sondaı-aq ónerkásiptik tutynýshy-ınvestorlar men elektr stansııalarynyń tizbesine engizilgen tutynýshylar úshin taýarlyq gazdy ishki naryqta kóterme saýdada ótkizýdiń shekti baǵalaryn bekitý jáne basqalary jónindegi quzyretteri tolyqtyrylady.

 

Sońǵy jańalyqtar

Atyraýda ury úsh jyldan keıin ustaldy

Aımaqtar • Búgin, 16:06

Almaty qalasynda jer silkindi

Ekologııa • Búgin, 11:00

Sora ekken turǵyn tergelýde

Aımaqtar • Keshe

Uqsas jańalyqtar