Sessııa jumysyna Atyraý oblysy Qazaqstan halqy Assambleıasynyń tóraǵasy, oblys ákimi Mahambet Dosmuhambetov qatysty.
Aımaq basshysy Qazaqstan halqy Assambleıasy 2020 jyly shırek ǵasyrlyq mereıtoıyn atap ótetin aıtty. Assambleıa elimizdegi barlyq ult ókilderin bir shańyraq astyna biriktirip, táýelsiz elimizdiń damýyna zor úles qosyp keledi.
-Elbasy, Qazaqstan halqy Assambleıasynyń tóraǵasy Nursultan Nazarbaev bizdiń halyqtyq ıgiligimiz - qazaqstandyq tabystyń mańyzdy úsh kiltin anyqtap berdi. Birinshisi – tiline, dinine bólinbesten, barlyq qazaqstandyqtardyń birligi. Ekinshisi – barlyǵymyzǵa jáne árqaısymyzǵa tán taǵattylyq. Etnostyq jáne dinı aıyrmashylyqty baıyppen túsiný jáne qurmetpen qabyldaý. Úshinshi – tarıhı taǵdyrymyzdyń ortaqtyǵy, dedi Mahambet Dosmuhambetov.
Assambleıa jumysy etnıkalyq máseleler sheńberinen shyqty. Qazir basty nazarda turaqtylyq pen damýdy qoldaýǵa barlyq qoǵamdyq kúshterdi biriktirý, azamattardy, azamattyq qoǵam, ǵylym men mádenıet ınstıtýttaryn tartý máselesi tur.
Oblysta qoǵamdyq kelisim, analar keńesi, «Jańǵyrý joly» jastar shtaby, ǵylymı-saraptama toby, jýrnalıster klýby tabysty jumys isteýde. Etnomádenı birlestikterdiń shyǵarmashylyq ujymdary oblys Assambleıasyn respýblıkalyq, halyqaralyq sharalarda laıyqty kórsetip júr.
-Keler jyly elimizde birqatar mańyzdy sharalar atalyp ótedi – ǵalym, fılosof Ábý Nasyr Ál-Farabıdiń 1150 jyldyǵy, uly Abaıdyń 175 jyldyǵy, Ata Zańnyń, Qazaqstan halqy Assambleıasynyń 25 jyldyǵy. Atyraýlyqtar elimizdegi osy mańyzdy sharalarǵa belsendilikpen qatysady degen senimdemin, dedi Mahambet Dosmuhambetov.
Oblys ákimi bizdiń tabysymyz Assambleıanyń barlyq músheleriniń birlese atqarǵan jumystarynyń jemisi ekenin atap ótti. Sessııa barysynda Assambleıanyń qoǵamdyq kelisim men ultaralyq tatýlyqty nyǵaıtýǵa úles qosyp júrgen belsendi músheleri marapattaldy.
Shara oblystaǵy etnomádenı birlestikterdiń ókilderi óner kórsetken konsertpen aıaqtaldy.
