Zań jobasy qoldanystaǵy qylmystyq jáne qylmystyq is júrgizý zańnamany odan ári jetildirý, sondaı-aq Qazaqstan Respýblıkasy Prezıdentiniń jekelegen qylmys quramy boıynsha tapsyrmalaryn iske asyrý maqsatynda ázirlengen bolatyn.
Zań jobasynda birqatar zańnamalyq aktilerge ózgerister men tolyqtyrýlar engizý kózdelip otyr.
Qujat Qazaqstan Respýblıkasynyń Qylmystyq kodeksine, Qazaqstan Respýblıkasynyń Qylmystyq is júrgizý kodeksine jáne «Jedel-izdestirý qyzmeti týraly» zańǵa zorlaý jáne nápsiqumarlyq sıpattaǵy kúsh qoldaný áreketteriniń barlyq quramy (onyń ishinde qyzmettik mindetterin oryndaý kezinde), balalarǵa jynystyq zorlyq-zombylyq faktileri boıynsha dáleldemelerdi burmalaǵany, sondaı-aq jasyrǵany jáne olar týraly habarlamaǵany úshin jaýapkershilikti kúsheıtý týraly; úı-jaıǵa, qoımaǵa nemese kólik quralyna kirip jasalǵan urlyq, tonaý jáne qaraqshylyq; zańsyz esirtki aınalymy úshin elektrondyq aqparattyq resýrstardy paıdalanǵany úshin jaýapkershilikti engizý týraly; mal urlyǵy boıynsha jeke quramdy engizý týraly; zańsyz ań aýlaýdy qylmystyq teris qylyqtan ortasha aýyrlyqtaǵy qylmystarǵa aýystyrý týraly, brakonerliktiń aýyrlatatyn quramdary úshin (onyń ishinde aqbókender boıynsha) jáne zorlyq-zombylyq qoldanǵany úshin, sondaı-aq janýarlar dúnıesin qorǵaý jónindegi memlekettik ınspektordyń ómirine qater tóndirgeni úshin jaýapkershilikti kúsheıtý týraly túzetýlermen tolyqtyrylatyn bolady.
Sonymen qatar odan ári izgilendirý jáne repressıvtilikti tómendetý bóligine, atap aıtqanda, múlikti tárkileýdi taǵaıyndaý jáne shartty jaza taǵaıyndaý kezinde, sondaı-aq kepildikke baılanysty jazadan bosatý kezinde kepil mólsherin tómendetý boıynsha túzetýler usynylady.
Sondaı-aq qylmystyq-atqarý zańnamasyna jazany oryndaý júıesin odan ári izgilendirýge baǵyttalǵan túzetýler de usynylady.
Zań jobasynda «nóldik tózimdilikti» kúsheıtýge, sondaı-aq qylmystyq jáne qylmystyq is júrgizý zańynyń erejelerin is júzinde qoldanýdyń olqylyqtaryn, kollızııalaryn jáne ártúrli oqylýyn joıýǵa baǵyttalǵan túzetýler kózdelip otyr.
Budan basqa, «Neke (erli-zaıyptylyq) jáne otbasy týraly» Qazaqstan Respýblıkasynyń Kodeksine jetim balalar men ata-anasynyń qamqorlyǵynsyz qalǵan balalardy Qazaqstan azamattarynyń otbasylaryna ornalastyrýǵa járdem kórsetý jónindegi uıymdardyń qyzmetin, olardy tirkeý tártibin, tirkeýden bas tartý negizderin, osy uıymdardyń quqyqtary men mindetterin retteıtin túzetýler engiziledi.
Zań jobasy Palatanyń qaraýyna berildi.
