Qazaqstan • 20 Jeltoqsan, 2019

Abylaı Myrzahmetov: Keıbir máselelerdi sheshýde asyǵys sheshim qabyldaýdyń qajeti joq

160 retkórsetildi

Ulttyq qoǵamdyq senim keńesiniń múshesi Abylaı Myrzahmetov Ulttyq keńestiń ekinshi otyrysyndaǵy Memleket basshysynyń tapsyrmalaryna qatysty pikir bildirdi.

- Ulttyq keńestiń birinshi otyrysynda eldi tolǵandyryp júrgen barlyq máseleler aıtylǵan bolatyn. Al ekinshi otyrysta aıtylǵan máseleler boıynsha atqarylǵan jumystar baıandaldy. Máselen jerdi tıimdi paıdalaný, ony zamanaýı sıfrly tehnologııamen baqylaý, múmkindigi shekteýli adamdarǵa arnaıy kvota bólý, jastarǵa qoǵamdyq-saıası lıftiler qurý, ataýly áleýmettik kómek berýde naǵyz muqtaj jandardyń alýyn qamtamasyz etý degen syndy kóptegen ózekti máselelerdiń sheshimin tabýǵa arnalǵan naqty usynystar aıtyldy, - dedi Abylaı Myrzahmetov.

Sondaı-aq ol keıbir máselelerdi sheshý úshin 2-3 aı azdyq etetinin aıtty. 

- Memleket basshysy jıynda keıbir máselelerdi sheshý úshin 2-3 aı azdyq etetinin aıta kele áli de talqyǵa salynyp, oń sheshim shyǵarylatynyn aıtty. Rasynda keıbir máselelerdi sheshýde asyǵys sheshim qabyldaýdyń qajeti joq. Osyndaı dıalog alańdarynda talqyǵa salyp, ortaq mámilege kelip, durys sheshim shyǵarǵan jón. Bul arqyly halyq pen memleket arasyndaǵy tyǵyz qarym-qatynas ta ornaıdy.  Áriptesterimniń aıtqan ár usynysy qoldaý taýyp, máselelerdiń kúrmeýi sheshilip jatqanyna qýanyshtymyn. Mysaly ekonomıka salasyndaǵy salyq tóleý, jerdi tıimdi paıdalaný, aqsha-nesıe strategııasy syndy máselelerdi Muhtar Taıjan aıtyp ótken bolatyn. Ekinshi otyrysta osy aıtylǵan máseleler ońdy sheshimin taýyp jatyr. Sondaı-aq jalǵan fırmalar ashyp, aqsha jymqyrýdyń san túrli tásilderin istep júrgenderge qarsy kúres uıymdastyrylatyny aıtyldy. Bul kópten beri kókeıde júrgen taqyryp edi.  Endi bul is te bir jolǵa qoıylatyn boldy, - dedi A.Myrzahmetov.

Sonymen qatar ol ıgerilmeı, bos jatqan jerlerdi tıimdi paıdalaný jaıyn sóz etti. 

- Jerdi tıimdi ıgerý máselesi tolyq sheshilse, qarapaıym halyqtyń ál-aýqaty áldeqaıda jaqsarar edi. Qazir ıgerilmeı, bos jatqan jerler óte kóp. Sol jerler halyqqa aýyl sharýashylyǵymen, mal sharýashylyǵymen aınalysýǵa berilse, ıgi is bolar edi, - dedi ol.

Sońǵy jańalyqtar

Abaı murasyna arnalǵan kórme

Rýhanııat • Keshe

Jaǵa ustatqan jat qylyq

Aımaqtar • Keshe

Uqsas jańalyqtar