Ilınka turǵyny A.Dosmaǵambetova kóshelerdi jaryqtandyrý boıynsha jumystardyń adal oryndalmaǵandyǵyn aıtty. «Joldy áli kúnge deıin asfalttaǵan joq, merdiger uıym jumystar aıaqtalatyn merzimdi atamaı, ýaqytty jyljytýmen boldy» dep atap ótti. Jumystardy oryndaýmen «Qulager» JShS merdigerlik uıymy aınalysady. Elorda ákimi Altaı Kólginov aýdan ákimine osy máseleni baqylaýǵa alýdy tapsyrdy.
Sondaı-aq qabyldaýda erekshe qajettilikteri bar balalardy tárbıelep otyrǵan otbasylardyń máseleleri boıynsha bastamashyl top ókilderi boldy. Budan buryn kezdesýde ońaltý kómegin kórsetý jaǵdaıyn jaqsartý jáne jasaý boıynsha 70-ke jýyq másele talqylandy. Suraqtardyń basym bóligi sheshildi, qalǵandary boıynsha jumystar júrgizilip jatyr. Qalada erekshe qajettilikteri bar azamattar úshin 2 ońaltý ortalyǵy, ıppodrom bazasynda - ıppoterapııamen aınalysýǵa arnalǵan jabyq manej salynady. Jańa turǵyn úı keshenderiniń birinshi qabattarynda emhana, balabaqsha, ońaltý ortalyqtary, polısııa pýnkti sııaqty áleýmettik nysandar ashylady. Jyl basynan beri ınvataksı sany 22 mashınadan 46-ǵa deıin, eki ese artty.
Bes jarym aı ishinde elorda ákimi Altaı Kólginov qabyldaýǵa jazylǵan 650-den turǵynmen kezdesti. Suraqtardyń basym bóligi sheshildi, qalǵandary baqylaýǵa alyndy. Sondaı-aq azamattardy qabyldaý aýdandyq ákimdikterde jáne «Januıa» otbasy ınstıtýtyn qoldaý ortalyǵynda ótip jatyr. 11,4 myńnan astam keńes berildi, 3.5 myńnan astam másele sheshimin tapty.
