Spıkerler Ulttyq keńes otyrysynda Prezıdenttiń aıryqsha mán bergen máselelerine toqtalyp ótti. Bekbolat Tileýhan Prezıdenttiń latyn álipbıine ótý taqyrybyna basa nazar aýdarǵanyn aıtty. «Bul máselede eshqashan asyǵýǵa bolmaıdy» degenin jetkizdi. «Memleket basshysy ǵalymdardyń pikirine súıenip, saraptama jasaý kerektigin aıtty», dedi ol.
Sondaı-aq ol Prezıdent Qasym-Jomart Toqaevtyń qazaq tilin reformalaý kerektigine qatysty pikirine toqtalyp ótti. «Atap kórsetken taǵy bir mańyzdy másele – qazaq tiline reforma jasaý. Bul másele boıynsha ǵalymdar tarapynan ekiudaı pikir qalyptasýy múmkin. Mysaly, túrik tiline reforma jasaý arqyly jalpy tilderdi ıgerý jaǵyn qarastyrǵan. Shyǵarmashylyq til – bir basqa, kúndelikti qoldanatyn aýyzeki til – basqa. Tildi saqtaý tek zańmen júzege asatyn nárse emes qoı. Munyń mańyzdylyǵyn estigen boıda túsine qoımaýymyz múmkin, biraq túbegeıli bir qadam jasalatyn bolsa, tildiń kókjıegi ashylady. Prezıdentimiz aıtqandaı, bul – jeńil-jelpi qaraıtyn nárse emes. Ǵalymdardyń eńbegi, qoǵam tarapynan kómek, reforma qajet bolyp tur. Bul – ult taǵdyryna qatysty mańyzdy qadam», dedi Bekbolat Tileýhan.
Al Ulttyq qoǵamdyq senim keńesiniń múshesi Jambyl Ahmetbekov óz kezeginde: «Ulttyq keńes otyrysynda úsh jumys toby qurylǵan bolatyn. Sol toptardyń jumys qorytyndysy halyqqa aqparat retinde taratyldy. Ulttyq keńestiń ekinshi otyrysynda Prezıdent Qasym-Jomart Toqaev alǵa qoıǵan maqsaty men keńestiń alǵashqy otyrysynda aıtylǵan máselelerdiń sheshilý barysy týraly baıandama oqydy. Qoǵamnyń kóńilinen shyǵyp otyrǵany óte kóp, sebebi aıtylǵan máselelerdiń sheshimi tabylyp jatyr», dedi.
Sonymen birge ol saıası reforma máselesine toqtalyp ótti. «Buǵan deıin halyq saıası reforma kerek ekenin aıtyp kele jatqanmen, ol bılik tarapynan eshqandaı sheshimin tapqan joq. Endi Ulttyq qoǵamdyq senim keńesi qurylǵannan keıin bul másele sheshimin tabatyndaı kórinedi. Mysaly, Prezıdent saıası reforma halyqty dúrbeleńge ákelmeıtin, birtindep jasalatyn reforma ekenin aıtty», dep oıyn bildirdi.
Oǵan qosa mıtınginiń qalaı ótýi kerektigi týraly jańa zań qabyldanatynyn málimdedi. Ol munyń jaı ǵana adam quqyǵy emes, jaýapkershilik ekenin aıta kele, «Júrgizýshi», «Qatysýshy» mártebesi paıda bolǵanyn habarlady. «Endi mıtıng ótkizer kezde burynǵydaı ruqsat alý máselesi emes, mıtınginiń qaıda ótetinin, qansha adam jınalatynyn jáne qandaı másele qaralatynyn eskertý mańyzdy bolmaq. Mıtınginiń ótýi zańnamaǵa qaıshy bolmaýy jáne qoǵamdyq tártipti buzbaýy kerek», dep túıindedi J.Ahmetbekov.
О́z kezeginde Ulttyq qoǵamdyq senim keńesiniń múshesi Saıasat Nurbek Memleket basshysynyń bilim máselesine qatysty aıtqan oılary tóńireginde pikirin ortaǵa saldy.
