Aımaqtar • 23 Jeltoqsan, 2019

Jambylda qarly boranda qalǵandar qutqaryldy

51 retkórsetildi

Jeltoqsan aıynyń sońǵy aptalarynda Jambyl óńirinde jel kúsheıip, buryn-sońdy bolmaǵan qarly boran turdy. Mezgildiń bul minezi jergilikti turǵyndar úshin de kútpegen jaǵdaı edi. Almaty qalasynan shyqqan jolaýshynyń Taraz qalasyna, al Taraz qalasynan shyqqan jolaýshynyń Shymkent, Túrkistan qalalaryna jetýi muń boldy.

Qatty jel men borannyń saldarynan kólik qozǵalysy qıyndap, tipti respýblıkalyq mańyzy bar Almaty-Tashkent avtokólik tasjolynyń Jýaly aýdanynyń aýmaǵy men Jambyl aýdany Aısha bıbi aýylynan Túrkistan oblysyna deıingi aralyǵy jabyldy. Birqatar kólikter qarly borannyń keptelisine tap bolyp, ishindegi jolaýshylar jolda qaldy.

Almaty-Tashkent tasjolynyń 565-593 shaqyrymynda, ıaǵnı Jýaly jáne Jambyl aýdandarynyń aýmaǵynda jolaýshylardy qutqarý maqsatynda Jambyl oblystyq tótenshe jaǵdaılar departamentiniń tarapynan 23 adam jáne 6 tehnıka jumyldyrylyp, atalǵan departament basshysynyń orynbasary, azamattyq qorǵaý polkovnıgi Talǵat Sabırov bastaǵan azamattar tehnıka kúshimen boran ishinen joldyń ashylǵan aýmaǵyna 26 avtokólikti súırep shyǵardy. Sonymen qatar, joldyń jabylýyna baılanysty 29 kólik toqtap qalyp, onyń ishindegi 140 eresek adam, 8 bala Jýaly aýdany, Baýyrjan Momyshuly aýylyna jáne 75 adam sol aýyldaǵy A.Gersen atyndaǵy orta mektepke kóshirildi. Aýdan ákimi Narbaı Ergebekov jolaýshylar ornalasqan jylytý pýnktterinde bolyp, olarmen kezdesti. Barlyq azamattar ystyq tamaqpen jáne basqa da qajetti zattarmen qamtyldy. Sondaı-aq, Talas aýdany, Qarataý qalasy men Sarysý aýdany, Jańatas qalasynyń arasyndaǵy Kúıik-Qarabastaý-Qarataý-Jańatas-Saýdakent aralyǵyndaǵy oblystyq mańyzy bar joldar da jabylǵan.

Bir qýanarlyǵy, tótenshe jaǵdaı saldarynan zardap shekken jolaýshylar joq. Jolda qalǵandarǵa múmkindiginshe barlyq jaǵdaı jasalǵan. Bul másele Jambyl oblysynyń ákimi Asqar Myrzahmetovtiń tikeleı baqylaýynda eken.

«Almaty-Tashkent jol ýchaskesiniń Jýaly aýdanyndaǵy aýa-raıynyń qolaısyzdyǵyna baılanysty oryn alǵan tótenshe jaǵdaı oblys ákiminiń tikeleı baqylaýynda. Qazirgi tańda oǵan tótenshe jaǵdaılar departamentiniń 30-ǵa jýyq qyzmetkeri jáne 6 birlik tehnıka jumyldyrylǵan. Avarııalyq-qutqarý jumystary júrgizildi. Búginde 3 jylytý pýnkti jumys atqarýda. Onda ystyq tamaq pen medısınalyq kómek uıymdastyrylǵan. Zardap shekkender joq. Medısınalyq kómekke júgingender bolmady. Shalǵaı aýyldardyń bárimen de baılanys ornatylǵan. Jolǵa qum tóseý, baqylaý boıynsha oblystyq tótenshe jaǵdaılar departamenti, «Qazavtojol» mekemesiniń oblystyq fılıaly jáne jol patrýldik polısııa qyzmetkerleri táýlik boıy jumystar atqarýda. Qazirgi tańda atalǵan baǵyt boıynsha «Arnaıy jeli» ashylyp, jedel shtab jumysy uıymdastyryldy. Ázirge júrgizýshiler men turǵyndardy alys jolǵa shyqpaýǵa shaqyramyz», deıdi oblys ákiminiń keńesshisi Jasulan Ábdihalyq.

«Saqtansań – saqtaıdy» deıdi halyq danalyǵy. Jambyl oblystyq polısııa departamenti de turǵyndardy ázirge alys jolǵa shyqpaýǵa shaqyryp otyr. Al, Kúıik asýynda jolda qalǵan jolaýshylardy jeter jerlerine temirjol tasymaly arqyly jetkizý jumystary uıymdastyryldy. Ázirge óńirde jaǵdaı turaqty bolǵanymen, tabıǵattyń tosyn minezi aldaǵy ýaqyttarda da qaıtalanýy múmkin degen boljamdar bar.

 

Jambyl oblysy

 

 

Sońǵy jańalyqtar

Abaı murasyna arnalǵan kórme

Rýhanııat • Keshe

Jaǵa ustatqan jat qylyq

Aımaqtar • Keshe

Uqsas jańalyqtar