Kórermender ár túrli sýretshilerdiń týyndylaryn tamashalaı alady. Ulttyq keskindeme mektebiniń negizin qalaǵan Qazaqstannyń alǵashqy kásibı sýretshileri ózderiniń talantyn 1920-1930 jyldary kórsetti. Olardyń shyǵarmalarynyń negizgi taqyryptary - revolıýsııalyq ózgerister dáýiri, jańa álemniń qalyptasýy, halyqtyń tarıhy. Ekspozısııanyń negizgi bóliginde aǵa býynǵa jatatyn sýretshilerdiń jumystary qoıylady. Ábilhan Qasteevtiń «Almatynyń jańa ǵımarattary», «Medeý muz aıdyny», Áýbákir Ismaılovtyń «Bes-Shatyr», Qanafııa Teljanovtyń «Kompozıtor S.Muhamedjanovtyń portreti», Moldahmet Kenbaevtiń «Alma-Ata mańyndaǵy taýlar», Uly Otan soǵysy jyldaryndaǵy kóptegen áıgili qazaq sýretshileriniń alǵashqy ustazy - A.M. Cherkasskııdiń «Kóknár» atty týyndysy usynylǵan.
Ekspozısııada mýzeı qorynda sonymen birge kórnekti qazaqstandyq keskindeme sheberleri Aısha Ǵalymbaeva, Gúlfaırýs Ismaılova, Salıhıtdın Aıtbaev, Janataı Shardenov, Sahı Romanov, Abdrashıt Sydyhanov, Toqbolat Toǵysbaev, Qanafııa Teljanov, Bahtııar Tabıev, Arıı Shkolnyı, Asqar Esdaýlet, sonymen qatar ózbek sýretshileri Oral Tansyqbaev , Bahtııor Babaev, Vladımır Býrmakınniń týyndylary qoıylady.
Sondaı-aq Aısha Galımbaeva men Gúlfaırýs Ismaılovanyń kópqyrly jáne árdaıym tanylatyn týyndylary kórermendi qyzyqtyratyn bolady. Improvızasııa shabytynyń shyńynda somdalǵan Janataı Shárdenovtiń peızajdary nemese Abdrashıt Sydyhanovtyń keskindeme belgileri kórermenge Qazaqstandaǵy keskindeme óneriniń tarıhyndaǵy jańa, kútpegen qubylystardy ashady.
«Qazaqstan - dala men taýlar rýhy» kórmesinde usynylǵan ár sýretshi men olardyń jumystary óziniń shyǵarmashylyq ereksheligimen tanymal dep aıtýǵa bolady.
