Spartakıada alańy elimizdiń aımaqtarynan kelgen sportshylardy erekshe jaǵdaıda qarsy alyp, mektep oqýshylarynyń konserttik baǵdarlamasymen bastaldy.
Nazarbaev Zııatkerlik mektepterin damytý jónindegi maman Aqmaral Idırısovanyń aıtýynsha, II jelilik spartakıada fýtzal, basketbol, voleıbol, toǵyzqumalaq ulttyq oıyndaryn ótkizýmen bastalǵan. Qazirgi kezde fýtbol men toǵyzqumalaq oıyndary óz máresine jetip, balalardyń demalys kúnderinde basketbol jáne voleıbol oıyndarymen jalǵasyn tabýda. Almatydaǵy hımııa-bıologııa baǵytyndaǵy mektepte qatysýshylar voleıboldan baq synasyp jatsa, fızıka-matematıka mektebinde basketbolshylar jarysqa túsýde. II jelilik spartakıadanyń maqsaty akademııalyq is-sharalarmen ǵana emes balalardyń sportqa qyzyǵýshylyǵyn, sondaı-aq zııatkerlik mektepte bilim alyp jatqan balalardyń dostyq qarym-qatynasyn nyǵaıtýdy kózdeıdi. Basketbol oıyndaryna aımaqtyq oıyndardan ozyq shyqqan 6 qyzdar jáne 6 uldar komandasy jınalǵan.
Pavlodar qalasyndaǵy hımııa-bıologııa baǵytyndaǵy Nazarbaev zııatkerlik mektebiniń deneshynyqtyrý pániniń oqytýshysy Serik Temirǵalıevtyń aıtýynsha, aqtyq fınalǵa deıin toptyq oıyndar ótti. Sonyń nátıjesinde jeńiske jetken úzdik 2 komanda fınaldyq oıynǵa qatysýǵa Almatyǵa kelgen. «Úzdik oıynshylardan jasaqtalǵan eki komandanyń, sondaı-aq osy jarysqa kelgen árbir komandanyń ózindik daıyndyq ádis-tásilderi bar. Barlyq komandalar jeńiske laıyq. Sondyqtan da úzdikter sport alańynda óziniń tapqyrlyǵy, ushqyrlyǵyna sene otyryp jeńiske jetedi»,- deıdiSerik Temirǵalıev.
Qazirgi kezde aımaqtyq kezeńniń voleıboldan úzdikteri hımııa-bıologııa baǵytyndaǵy mektepte baq synasýda. Nur-Sultan, Pavlodar, Qaraǵandy, Shymkent, Aqtóbe, Oral qalalarynan jınalǵan sportshylar úsh kún boıy jarys dodasyna túsip, úzdikter irikteletin bolady.
ALMATY
