Sáýir aıynda aýdanymyzǵa ákim bolyp taǵaıyndalǵan Dildábek Orazbaev mamyr aıynda Mamyrsý aýylynyń turǵyndarymen kezdeskende: «Aýyldaryńyzda ardagerler bas qosyp otyratyn bólme bar ma?» degen saýal qoıdy. Mundaı bólme bizde joq bolatyn. Eki kúnnen keıin aýdan ákiminiń ókimimen aýyl ákimshiligi ǵımaraty ishinen bizge úlken bólme berilip, ony jabdyqtaý jumystaryn bastap kettik. Bólmege Mamyrsý aýylynyń irgetasyn qalaǵan, asharshylyqty da, soǵysty da kórgen, tylda da aıanbaı eńbek etken ardagerlerdiń sýretterin qoısaq degen sheshimge keldik. Bul jumysty aýyldaǵy ardagerler keńesiniń tóraǵasy qolǵa alsa degen usynys aıtyldy. Sol kúnnen bastap aýylymyzdyń ardagerleriniń sýretterin jınaqtaı bastadyq. Osy jumystyń ózine jeti aıdaı ýaqyt ketti. Sodan ne kerek, 25 qarashada ardagerler bólmesi saltanatty túrde ashyldy.
Bólmeni ózimizshe úsh bólimge bólip, áýeli aýylymyzdyń ekinshi dúnıejúzilik soǵysqa qatysqan jáne Aýǵan soǵysyna baryp, oralmaǵan azamattardyń sýretterin ildik. «Er eńbegi - el esinde» dep atalǵan ekinshi bólimde sovhoz kezinde eńbegimen el qurmetine bólengen aǵa býyn ókilderiniń, sovhoz, mektep basqarǵan azamattardyń sýretteri ornalastyryldy. «Alyp anadan týady» atty bólimde Batyr ana, Altyn alqa, Kúmis alqa ıegerleri atanǵan ardaqty analardyń sýretteri tórden oryn aldy. Jalpy, ardagerler bólmesine 500-den astam sýretter ilindi. Shaǵyn ardagerler bólmesin ótkennen úlken syr shertetin, jastarǵa tárbıelik máni bar tarıhı mýzeı dese de bolady. Ardagerler bólmesiniń ashylýyna muryndyq bolǵan aýdan ákimi D.Orazbaevqa, osy istiń basy-qasynda júrgen aýyl ákimi A.Ibraıshınge, qol ushyn bergen aýyl azamattaryna alǵysymyz sheksiz.
Orynbek Turysbekuly,
Mamyrsý aýyldyq ardagerler keńesiniń tóraǵasy
Shyǵys Qazaqstan oblysy,
Aıagóz aýdany
