Qazaqstanda Sharl Perronyń ámbege aıan ertegisi alǵash ret balet sahnasynda qoıylyp otyr. Qoıýshy-horeograf Nadejda Kalınına, kóptegen halyqaralyq baıqaýlar men festıvalderdiń laýreaty ári júldegeri.
«Sergeı Prokofevtiń óte kúrdeli mýzykasyna «Kúlshe qyz» baletin qoıý týraly teatryńyzdyń usynysyn zor jaýapkershilikpen qabyldadym. «Kúlshe qyz» baleti kompozıtor aıtqandaı úsh emes, eki kórinisti. Keıbir ǵajaıyp mýzykalyq ıirimderdi tutas alyp tastaýymyzǵa týra keldi. Dekorasııa kólemi, qatysýshy ártisterdiń sany turǵysynan alar bolsaq, osy tektes spektakl buryn-sońdy qoıylmaǵan», deıdi, horeograf.
Sýretshi Sergeı Novıkovtyń áserli dekorasııalary men kostıýmderi, jaryqpen bezendirý jáne beıne keskin arqasynda, osy qoıylymdaǵy árbir sahna, shyn máninde de, ǵajaıyp ertegiler kitabyn paraqtap otyrǵandaı kúıge túsiredi.
«Teatr orasan jumys atqardy. Sebebi, spektaldi bezendirýdiń basty ıdeıasy – kishkentaı qyzdyń kúndeligin, onyń qııal álemin kórsetý kerek boldy», deıdi Sergeı Novıkov.
Atalǵan qoıylymǵa balet trýppasy bastan-aıaq, Qazaq ulttyq horeografııa akademııasynyń oqýshylary men stýdentteri qatysty. Kúlshe qyz partııasyn Tatıana Ten men Nazerke Aımuhametova, Hanzadany – Qazbek Ahmedııarov pen Súndet Sultanov oryndap shyqty.
Aıta keteıik, kóp uzamaı, ǵajaıyp baletti elimizdiń ózge qalalarynyń turǵyndary da tamashalaı alatyn bolady. Aqpannyń 20, 22 jáne 23 kúnderi «Astana Balet» teatry Almatyǵa gastroldik saparmen barady.
