Qoǵam • 23 Jeltoqsan, 2019

Elimizdegi áleýmettik-eńbek salasyndaǵy ahýal qandaı?

52 retkórsetildi

Ortalyq kommýnıkasııalar qyzmetindegi baspasóz konferensııasynda Kásiptik odaqtar federasııasynyń tóraǵasy Eraly Toǵjanov QRKF qyzmetindegi basty baǵyttar, sondaı-aq elimizdegi áleýmettik-eńbek salasyndaǵy ál-ahýal týraly aıtty.

Qazaqstan Respýblıkasy Kásiptik odaqtar federasııasy (QRKF) - eń iri qoǵamdyq uıym. Onyń quramyna 2 mıllıon eńbekker, 23 respýblıkalyq salalyq, 17 aýmaqtyq kásipodaqtar birlestigi men 18 myń bastaýysh kásipodaq uıymdary kiredi.

Kásiptik odaqtardyń basty mindeti – eńbek qatynastary salasynda áleýmettik turaqtylyqty qamtamasyz etý. Munda basty faktor – Eńbek adamynyń quqyqtary men múddelerin qorǵaý.

«QRKF tóraǵasy retinde úsh aıda men Atyraý, Batys Qazaqstan, Qaraǵandy, Mańǵystaý, Qostanaı, Túrkistan oblystaryn, sonymen qatar, Shymkent pen Almaty qalalarynda bolyp, óńirlerdegi eńbek salasyndaǵy jaǵdaıdy óz kózimmen kórip qaıttym. Kásipodaq uıymdarynyń múshelerimen, eńbek ujymdarymen jáne óńirlerdiń ákimderimen kezdesýlerde biz munaıshylardyń, kenshilerdiń, pedagogtar men medısına qyzmetkerleriniń máselelerin talqylap, halyqtyń eńbek quqyqtaryn qorǵaý máselelerin qarastyrdyq», - dep málimdedi Eraly Toǵjanov.

Osy oraıda ol QRKF qyzmetindegi negizgi baǵyttardy, ıaǵnı tıimdi áleýmettik áriptestik, eńbek daýlary men kıkiljińderdiń aldyn-alý jáne sheshý, eńbek qaýipsizdigi jáne eńbekti qorǵaý, ujymdyq sharttardy engizý, kásibı aýrýlar qaýpin azaıtý, zańnamany jetildirý, qaryzdy eńbekti qoldaný máselelerin retteý, QRKF áleýmettik jobalaryn nasıhattaý jáne halyqaralyq áriptestikti nyǵaıtýdy atap ótti.

Áleýmettik áriptestiktiń teń quqyly qatysýshysy retinde Kásipodaqtar federasııasy Úkimet jáne jumys berýshilermen birge elimizde tıimdi áleýmettik-eńbek qatynastaryn qalyptastyrý boıynsha kelisilgen strategııany júzege asyrýda.

Áriptestik negizi – QR Úkimeti, respýblıkalyq jumysshylar birlestikteri men respýblıkalyq jumys berýshiler birlestikteri arasyndaǵy 2018-2020 jyldarǵa arnalǵan Bas kelisim, sondaı-aq 21 salalyq jáne 17 jergilikti kelisim.

Eńbek daýlary men kıkiljińder týraly sóz qozǵaǵanda, QRKF basshysy kóp jaǵdaıda eńbek daýlary bastaýysh kásipodaq uıymdary qurylmaǵan kásiporyndarda oryn alatynyn atap ótti.

Sonymen qatar, ol aǵymdaǵy jyly eńbek daýlaryna qatysty oqıǵalar sanynyń artqanyna toqtalyp ótti. Sońǵy 3 aıdyń ishinde 18 ujymdyq eńbek daýy tirkelgen. Máselen, Mańǵystaý oblysynda – 7 jaǵdaı, Almatyda – 5, Aqtóbe oblysynda – 2 oqıǵa oryn alǵan.

Eńbek daýlary kóp jaǵdaıda tómengi jalaqy, sheteldik jáne otandyq jumysshylar arasyndaǵy jalaqyda dısproporsııa, jumys berýshilerdiń jumysshylar talabyn eskermeýi, áriptestikten jáne ózara tıimdi sheshimderdi qarastyrýdan bas tartýy, eńbek salasy jáne kásipodaq qyzmeti jónindegi qoldanystaǵy zańnamanyń kemshiligi saldarynan oryn alady. 2018 jyly QR Joǵarǵy sotymen ózara yntymaqtastyq týraly memorandýmǵa qol qoıyldy, munyń aıasynda aýmaqtyq kásipodaqtar birlestikteri bazasynda 17 Tatýlasý ortalyǵy quryldy.

Osy jyly tatýlasý ortalyqtarynda 1700 medıasııalyq rásimder ótkizildi, olardyń ishinde 1583 jýyq eńbek daýy ońtaıly sheshildi.

Federasııa tóraǵasy óndiristik jaraqat máselelerine aıryqsha toqtalyp ótti.

Eńbek jáne halyqty áleýmettik qorǵaý mınıstrliginiń málimetterine súıensek, aǵymdaǵy jylǵy 1 jeltoqsandaǵy jaǵdaı boıynsha 1215 adam zardap shegip, olardyń 148-i qaza boldy.

Búginde kásipodaqtardyń bastamasymen barlyq óńirlerde «Qaýipsiz eńbek» jergilikti baǵdarlamasy júzege asyrylýda.

Respýblıka boıynsha kásiporyndarda 15 myń eńbek qaýipsizdigi jáne eńbekti qorǵaý jónindegi óndiristik keńester jumys isteıdi, olardyń 95%-dan astamy kásipodaqtardyń bastamasymen quryldy. Sonymen qatar kásipodaqtardan 18 810 tehnıkalyq ınspektorlar osy másele boıynsha qoǵamdyq baqylaýdy júzege asyryp jatyr.

Sońǵy jańalyqtar

Abaı murasyna arnalǵan kórme

Rýhanııat • Keshe

Jaǵa ustatqan jat qylyq

Aımaqtar • Keshe

Uqsas jańalyqtar