«Samuryq-Energo» óz kompanııalaryn sıfrlandyrýdy jalǵastyryp keledi

Osy aýqymdy jumystyń aıasynda holdıngke qarasty aksıo­ner­lik qoǵamnyń biri – «Alataý jaryq kompanııasy» dıspetcherlik pýnktterdi qaıta qurylymdaý jobasynyń tusaýkeserin ótkizdi.

Kompanııa basshylyǵynyń aı­týynsha, bul qalada jeti dıs­petcherlik pýnkt bolsa, sonyń altaýy qaıta jańartylyp otyr, al bireýi – onsyz da jańadan salyn­ǵan nysan. Joba Almaty qala­synyń energojúıesindegi aýyt­qýlar men apatty jaǵdaılardy joıýda jyldam ári durys sheshim qabyldaýǵa zor múmkindik beredi. Bir aıta keterligi, «Alataý jaryq kompanııasy» alty aýdandyq dıspetcherlik pýnktterdi jedel-aqparattyq keshendermen jáne ujymdyq paıdalanýdy beıneleý júıelerimen (beınepanelder negizinde) jaraqtandyra otyryp, qaıta qurylymdaý jobasyn Qazaqstanda alǵash ret júzege asyryp otyrǵan kompanııa.

Bul rette, ujymdyq paıdalaný aqparatyn beıneleıtin júıeni aýqymdy beıneqabyrǵa deýge bolady. Beıneqabyrǵadan negizgi ener­gııa obektileri, sonyń ishin­de barlyq kommýtasııalyq appa­rattar beınelengen qosal­qy stan­salar, jalpy, sol aýdan­nyń kommýtasııalyq shemasy tú­gel kórinip otyrady. Beıne­qa­byr­ǵany dıspetcher jumys ornynda otyryp basqara alady.

«Bul joba, birinshi kezekte, elektr toraptyq keshendi basqarý júıesin únemi jetildirýge jáne tutynýshylardy úzdiksiz elektr qýa­­tymen qamtamasyz etýge ba­ǵyt­tal­ǵan. Al «Alataý jaryq kom­pa­nııa­synyń» basty mindeti de sol, tu­ty­nýshylarǵa sapaly qyz­met kór­s­etý», dep atap ótti tusaý­ke­ser rá­si­mine qatysqan «AJK» AQ Bas­qa­rma tóraǵasy Muhıt Úmbetov.

Dıspetcherdiń jumys ús­telinde ornatylǵan SCADA jú­ıesi toraptardyń jalpy shema­syn, sondaı-aq Telemetrııa de­rek­terin shyǵara otyryp, energııa nysandarynyń bir jeli­degi shemasyn kórsetýge múmkin­dik beredi. Bul óz kezeginde torap­tardy basqarý jedeldigin aı­tar­lyq­taı arttyryp, tóten­she jaǵdaılarǵa tez áreket etý múmkindigi paıda bolady. Sony­men qatar dıspetcherlik pýnkt­terdi qaıta jabdyqtaý dıs­pet­cher­lerdiń jumysyn tıimdi etedi.

Eń bastysy, kompanııa bas­shy­­lyǵy atap ótkendeı, osy jo­banyń aıasynda buryn qaǵaz jú­zinde saqtalǵan barlyq qujat­tar elektrondy formatqa kóshirilgen.

Esterińizge sala keteıik, «Sa­muryq-Energo» holdıngine qaras­ty «Alataý jaryq kompa­nııasy» – Al­maty qalasy men Almaty ob­­ly­synda elektr to­rap­­tarynyń se­nim­di jumys is­teýin jáne tıimdi da­mýyn qamta­ma­syz etetin, iri óńir­lik energııa jetkizýshi kompanııa.