Ekibastuzǵa barǵan jolsapar barysynda «Erkem-aı» balabaqshasynda boldyq. Buryn jekeniń qolynda bolǵan nysan memleket menshigine qaıtarylǵan eken. Nysanǵa jergilikti «Gıdroprom» JShS bıýdjetten bólingen 318 mıllıon teńge qarjyǵa kúrdeli jóndeý jumystaryn júrgizipti. Maýsym aıynda ashylǵan «Erkem-aıda» Nur-Sultan qalasynan kóship kelgen kóp balaly otbasylardyń 22 balasy tárbıelenýde. Kóp balaly jáne az qamtylǵan otbasynan shyqqan bul balalar úshin balabaqsha tegin, aqyly úıirmelerge de tegin qatysady.
Balabaqsha meńgerýshisi Injý Bolathanqyzynyń aıtýynsha, balalardyń barlyǵy beıimdelýden jaqsy ótti, túrli saıystar men kórmelerge belsene qatysady. Balabaqshada 6 topqa bólingen 150 bala tárbıelenýde.
Mysaly, qonys aýdarýshylardyń biri Nesipbekovterdiń qyzdary Gúldana, Ǵaını «Bolashaq» eresekter tobyna barady, óte alǵyr, mánerlep óleń oqyǵandy unatady. Analary Gúlnur Áshimbaıqyzy «О́mir» ońaltý ortalyǵynda qyzmetke turypty. Araılym, Aızere, Erkeniń ákeleri – Esbolat Samatuly, al Arýna 6 balaly otbasynyń kenjesi. Anasy Aqmaral dúkenge satýshy bolyp ornalasypty.
Qýanyshty sátti asyǵa kútip júrgen Ibadildinovter otbasynyń Áıkerim, Narmın, Aıaýlym esimdi úshemderi alǵashqy kúni-aq balabaqshaǵa qabyldanypty. Al «Aıgólek» tobynda qazaq balalarymen birge Mıron, Mıhaıl, Adelına, Nıkıta, Petr, Anfısa sııaqty balalar kelýde. Kishkentaı Mıronnyń anasy Olesıa Aleksandrovna úı sharýasynda, ákesi Vıktor Movchan avtomehanık bolyp jumys isteıdi. Ata-anasy Mıronnyń qazaq tilin úırenýin quptap, balalarynyń jańashyl «Mega ıntellektým» jobasynda úırengenderin qalaǵan eken.
Qalǵan otbasylary da balabaqshanyń ereksheligin estip, jańa jobanyń qajettigin túsinip, qazaq tilin úırenýde.
Balabaqshanyń ereksheligi, oblystyq «Oına» zııatkerlik ortalyǵymen birlesip, kishkentaılardyń ıntellektýaldyq damýyn qamtamasyz etetin baǵdarlamamen jumys isteıdi. Bolashaqta balabaqsha olımpıada, elektrondy testileý ótkizý ornyna aınalmaq. «Mega ıntellektým» jobasy boıynsha baldyrǵandar qurylys konstrýktorlary, magnıtti lego arqyly keńistikte túrli oıyndar qurastyra bilýdi, tústerdi ajyratýdy, sanaýdy meńgeredi. Mysaly, 3-5 jas aralyǵyndaǵy balalar álemdik jetekshi oıyndardan jınalǵan «Intellektým» kabınetindegi zııatkerlik baǵyttaǵy oıyndar, testileý tapsyrmalaryn, olımpıadalyq jattyǵýlardy meńgeredi. Al 5-6 jastaǵy balalar alǵan bilimderin «Robottehnıka» jobasymen qorytyndylaıdy.
Balabaqshanyń Qamqorshylyq keńesi balalardyń tamaqtanýyn qadaǵalaıdy. Barlyq dárýmender qajetti deńgeıde beriledi. Ata-analar tarapynan shaǵym bolǵan joq. Ata-analarmen birlese otyryp, taqyryptyq sýretter kórmesi uıymdastyryldy, merekelik erteńgilikter ótkizildi. Balalar «Erkem-aı» áýenin orkestrde oryndap, ulttyq oıyndardy qyzyǵa oınady.
Pavlodar oblysy,
Ekibastuz qalasy
