Qara sózdiń has sheberiniń byltyr Londonda aǵylshyn tilinde jaryq kórgen kitabynyń bir danasy da zaldyń tórinen oryn alypty. Ádebı zaldyń ashylý saltanatynda qonaqtarǵa kitaphana saıtyndaǵy «Oralhan Bókeı álemi» paraqshasy tanystyryldy. Kitaphana dırektory Habıba Aqjigitovanyń aıtýynsha, Oralhan Bókeıge qatysty barlyq málimetterdi, jazýshynyń kitaptaryn, aıtqan sózderin, jazǵan kúndelikterin, qalamger jaıyndaǵy estelikterdi, maqalalardy, fılmderdi, ǵylymı jumystardy osy paraqshadan kórýge bolady.
«Jazýshynyń álemniń ózge tilderine aýdarylǵan shyǵarmalaryn da saıttan taba alasyzdar. Ádebı zalǵa, jańadan ashylǵan saıttaǵy paraqshaǵa materıaldar nebári 3 aıdyń ishinde jınaldy. Muny áli de tolyqtyratyn bolamyz. Aldaǵy ýaqytta jazýshy atyndaǵy ádebı zalda ártúrli kezdesýler, shyǵarmashylyq keshter jáne taǵy basqa da sharalar uıymdastyramyz. Aı saıyn osy jerde Oralhan Bókeıdiń bir shyǵarmasyn talqylap otyrý josparymyzda bar. Sózdiń oraıy kelgende ádebı zaldy kerek-jaraqtarmen jabdyqtaýǵa kómektesken kásipker Ǵanı Shaımardanovqa, «Kazsınk» jáne «Oreol LTD» kásiporyndaryna alǵysymdy jetkizgim keledi», deıdi ol.
Ádebı zaldyń ashylýyna shahardaǵy zııaly qaýym ókilderimen birge jazýshynyń qaryndasy Ǵalııa Bókeıqyzy men О́skemen qalasynyń ákimi Jaqsylyq Omar qatysyp, Oralhan Bókeıdiń ádebı zalynyń ashylýy shahardyń mádenı ómirindegi aıtýly jańalyq ekendigin atap ótti. Ǵalııa Bókeıqyzy sóz arasynda qazirgi ýaqytta qaraýsyz turǵan Katonqaraǵaı aýdanynyń Shyńǵystaı aýylyndaǵy Oralhan Bókeıdiń mýzeıi aldaǵy ýaqytta nazardan tys qalmaıtynyn, osy oraıda «Oralhan Bókeı úıi» atty halyqaralyq qor qurylyp jatqanyn jetkizdi.
