IIM osy jyly «Sheteldikterdi shaqyrý» qyzmetin elektrondy formatqa kóshirdi. Elge shaqyrýdy rásimdeý – bul Ishki ister mınıstrligi kórsetetin suranystaǵy memlekettik qyzmetterdiń biri. Dál osy shara Qazaqstanǵa kelgisi kelgen sheteldik azamattardy áýrege salyp, kóp ýaqyttaryn alatyn. Qujattardy jınaqtaý, Qazaqstan elshiligine barý jáne jaýap kútý keıde 30 jáne odan da kóp kúnge sozylady.
Bul qyzmetti endi úıden shyqpaı-aq kóshi-qon vızasy www.vmp.gov.kz. portaly arqyly 5 kúnde alýǵa bolady.
Kóshi-qon vızasy portalyndaǵy jeke kabınette sheteldikke shaqyrtýdy rásimdeýshi tulǵaǵa ótinishti toltyryp, sheteldiktiń jeke málimetterin engizý, elektrondy úkimet portalynyń tólem shlıýzy arqyly memlekettik baj salyǵyn (árbir shaqyrylýshyǵa 0,5 AEK) tóleý qajet.
Arada 5 jumys kúni ótkende ótinish berýshiniń jeke kabınetine shaqyrtýdyń 10 tańbaly tirkeý nómiri kelip túsedi, osy nómirdi sheteldik azamatqa habarlaý qajet.
Al sheteldik azamat kóshi-qon vızasy portalynda ótinimdi toltyrady.
Arada 15 mınýt ótkende sheteldik elektrondy vıza alady.
Elektrondy vızany qaǵazǵa shyǵaryp, Qazaqstan shekarasynda tólqujattyq tekserýden ótý kezinde shekara qyzmeti qyzmetkerlerine kórsetýi kerek.
Qazirgi ýaqytta Qazaqstanǵa iskerlik maqsatta keletin sheteldikterge elektrondy shaqyrtý qyzmeti bir rettik elektrondy vıza rásimdeý úshin «V1», «V2» jáne «V3» sanattary boıynsha jáne jeke maqsattarmen keletinderge «V10» sanaty boıynsha qoljetimdi.
Atap óter jaıt, qazirgi ýaqytta elektrondy vızanyń kómegimen Nur-Sultan jáne Almaty qalalaryndaǵy halyqaralyq áýejaılarynda tólqujattyq tekserýden ótýge bolady. Osyndaı tártipti Qazaqstan Respýblıkasynyń memlekettik shekarasyndaǵy ózge ótkizý pýnktterinde de 2020 jyly qoldaný josparlanyp otyr.
