Is-sharada sóz sóılegen M.Áshimbaev kadr rezervin anyqtaýdyń mańyzyna toqtalyp, maqsaty men mindetin atap kórsetti.
«Memleket basshysy Qasym-Jomart Toqaevtyń mańyzdy bastamalarynyń biri – Prezıdenttik kadr rezervin jasaqtaý. Muny alǵash ret saılaýaldy baǵdarlamasynda jarııalaǵan bolatyn. Prezıdent tapsyrmasyna sáıkes birneshe aı boıy aýqymdy jumys atqaryldy. Saraptamalyq komıssııa usynǵan kandıdattar qaralyp, 300 qazaqstandyq jas iriktelip alyndy», dedi Prezıdent Ákimshiligi Basshysynyń birinshi orynbasary.
M.Áshimbaevtyń sózine qaraǵanda, rezervke engen jastar memlekettik basqarý júıesindegi jaýapty qyzmetterge taǵaıyndalady. Mundaǵy basty maqsat – bilikti basshylardyń jańa býynyn qalyptastyrý jáne jastar úshin áleýmettik lıftiniń utymdy júıesin qurý.
«Bul rezerv memlekettik qyzmet salasyn jańartýǵa, ozyq oıly jas kóshbasshylardy jumyldyrýǵa jáne jastardy yntalandyrýǵa múmkindik beredi. Biraq muny joǵary laýazymǵa usynylatyn top dep qaraýǵa bolmaıdy. Bul joba jastardy halyqqa shyn nıetimen qyzmet etýge yntalandyrýy tıis», dedi Prezıdent Ákimshiligi Basshysynyń birinshi orynbasary.
M.Áshimbaev atalǵan joba bir kúndik bastama emes ekenin atap ótti. Bul – elimizdegi basqarý júıesin jańǵyrtýdyń naqty tetigi jáne uzaqmerzimdi saıasat.
«Irikteýden ótkender jaýapty qyzmetterge taǵaıyndalady. Bul joba keıin de jalǵasady. Basqa da jastar kadrlyq rezervke enedi. Jalpy, Prezıdent bul jumysty jalǵastyrý týraly naqty tapsyrma berdi», dedi ol.
Jobaǵa 300 adam ǵana iriktelse de, tizimge enbeı qalǵan jastar nazardan tys qalmaıdy. Olar kelesi irikteýde qaıtadan qujat tapsyra alady. Qazirgi jeńimpazdar rezervte 5 jyl bolady. «Jastar ósip keledi. Jańarý prosesi júredi. Sol sebepti irikteý erte ótýi múmkin. Onyń naqty ýaqyty, jıiligi ulttyq komıssııanyń otyrysynda sheshiledi. Ázirge 300 jasty damytý, quzyretin arttyrý jumystary kútip tur», dedi M.Áshimbaev.
Jıyn barysynda Prezıdenttik jastar kadr rezervine iriktelgenderdiń keleshegi týraly da sóz boldy.
«Jalpy, úmitkerdiń bári birden taǵaıyndalmaıtynyn eskerý kerek. Jaqyn arada Prezıdenttik jastar kadr rezervine qatysýshylar memlekettik organdar men ulttyq kompanııalarda ártúrli pozısııada jumys isteı bastaıdy. Qatysýshylardyń keıbiri karerasyn jeke sektorda jalǵastyrýdy kózdeýi múmkin. Bul – olardyń quqyǵy. Ol salaǵa da jaqsy mamandar qajet», dedi M.Áshimbaev.
Sondaı-aq ol jumysqa ornalasý mehanızmi qalaı júzege asatynyn da áńgimelep berdi. Birinshiden, jarııalanǵan tizim men soǵan sáıkes qujattar ákimderge, mınıstrlerge, memlekettik organ basshylaryna jiberiledi. Olar tizimdi qarap, jas mamandardy ózderine jumysqa shaqyrady.
«Ekinshiden, Prezıdent Ákimshiligi óz quzyreti sheginde keı mekemelerge tıisti mamandardy usynady. Úshinshiden, Memleket basshysy Qasym-Jomart Toqaev Prezıdenttik jastar kadr rezervi boıynsha sheshim qabyldap, jaýapty memlekettik pozısııaǵa taǵaıyndaýy múmkin. Osy baǵyttar boıynsha jumys kelesi jyldan bastalady. Ony Prezıdent Ákimshiligi baqylaıdy», dedi Prezıdenti Ákimshiligi Basshysynyń birinshi orynbasary.
Memlekettik qyzmet isteri agenttiginiń tóraǵasy A.Jaıylǵanova óz sózinde irikteý jumystary qalaı júrgizilgeni, kadrlyq rezervke ótinish bergender týraly aıtyp berdi. «Memleket basshysy Qasym-Jomart Toqaevtyń «Igilik barshaǵa! Sabaqtastyq. Ádildik. О́rleý» saılaýaldy baǵdarlamasynda agenttiktiń aldyna Prezıdenttik jastar kadr rezervin qalyptastyrý mindeti qoıyldy. Búgin biz Prezıdenttik jastar kadr rezervine irikteýdiń aıaqtalǵanyn qýanyshpen habarlaımyz», dedi A.Jaıylǵanova.
Prezıdent bastamasyna alǵashynda 13 myńnan astam qazaqstandyq qatysýǵa nıet bildirgen. Qatysýshylarǵa otyz bes jastan aspaǵan, joǵary bilimi jəne bes jyldan kem emes eńbek ótili bar Qazaqstan azamaty bolýy tıis degen talaptar qoıyldy.
«Jeńimpazdar arasynda jeke sektordyń – 106 ókili, kvazımemlekettik sektordyń – 98 qyzmetkeri jáne 96 memlekettik qyzmetker bar. Kandıdattardyń 58 paıyzy sheteldik oqý ordalarynda bilim alǵan. 42 paıyzy – qazaqstandyq JOO túlekteri. 6 adam – ǵylym doktory, 204 adam magıstr dárejesine ıe», dedi A.Jaıylǵanova.
Agenttik tóraǵasynyń aıtýynsha, irikteý jeńimpazdarynyń ortasha jasy 31-di quraǵan. Sondaı-aq olar túrli salada aıtarlyqtaı tájirıbege ıe. Irikteýden ótkenderdiń kóbi iri sheteldik jáne transulttyq kompanııalarda jumys istegen, áli de jumys isteıtinderi bar.
«Rezerv irikteýine shetelde júrgen qazaqstandyqtar da belsene qatysty. Elimizdiń barlyq aımaqtarynan, sondaı-aq shetelderde jumys isteıtin qazaqstandyqtardan ótinish kelip tústi. О́ńirler arasynda úmitkerlerdiń eń kóbi Almaty (46), Qaraǵandy (41) jáne Shyǵys Qazaqstan oblysyna (30) tıesili», dedi agenttik basshysy.
Budan keıin sóz alǵan Memlekettik basqarý akademııasynyń rektory E.Ábil kadr rezervindegi kandıdattar Prezıdent janyndaǵy Memlekettik basqarý akademııasy jáne basqa da uıymdarda biliktiligin arttyra alatynyn jetkizdi.
«О́zińdi úzdiksiz damytyp otyrý – jetistikke jetý men eńbekke qabiletti bolýdyń kepili. Qatysýshylarda ózderiniń damý deńgeıin kórý múmkindigi bar. Ár rezervshi kezeń saıyn qandaı nátıje kórsetkeni týraly esep alyp otyrdy. Bul – qurǵan jospardyń damýynyń negizi», dedi Erlan Ábil.
Onyń aıtýynsha, memlekettik basqarý salasyna arnalǵan «Oılaý dızaıny», «Emosıonaldy ıntellekt», «Strategııalyq menedjment», «Jobalyq menedjment», «Bıznes-prosesterdi júzege asyrý» jáne taǵy da basqa trenıngter jobasy jasalǵan. Bul baǵdarlamalardyń trenerleri – otandyq jáne sheteldik jetekshi sarapshylar. Olardyń kásibı deńgeıleri joǵary. Rezervtegiler osy trenıngterdiń birin tańdap, kásibı biliktiligin arttyrmaq.
Esterińizge sala keteıik, Prezıdenttik jastar kadr rezervine tirkelý bıylǵy qyrkúıek aıynda bastaldy. Jobanyń strategııalyq maqsaty – tıimdi menedjerlerdiń jańa tolqynyn qalyptastyrý jáne elimizdiń jańa býyny úshin pármendi áleýmettik lıftiler júıesin qurý. Irikteý nátıjeleri boıynsha pýlǵa jańa formasııanyń basqarýshylary bolýǵa qabiletti talantty jáne kreatıvti jas qazaqstandyqtar irikteldi.
Irikteý ashyq ári ádil ótti
Aqerke BERLIBAI,
Prezıdent janyndaǵy Memlekettik basqarý akademııasynyń baspasóz hatshysy:
– Joba uıymdastyrýshylarynyń biri retinde jobanyń tujyrymdamasyn daıyndaǵan kúnnen bastap basy-qasynda júrmin. Shynymen de bul – biregeı joba. Irikteý ashyq ári ádil ótti dep tolyq senimmen aıta alamyn. Úmitimiz aqtaldy, sebebi bul jobaǵa sheteldik jastardyń da qyzyǵýshylyǵy joǵary boldy. Baıqaý jarııalanǵanda 13 myńnan astam adam ótinim berdi. 7312 adam tolyq tirkelip, birinshi kezeńge ótti. Olardyń maqsaty aıqyn, jobadan ne kútetinin anyq biledi. Al barlyq kezeńnen súrinbeı ótken 300 qatysýshynyń bolashaǵy jarqyn der edim. Sebebi olar – talantty, aqyldy, bilikti mamandar. Men olardyń árqaısysyn jeke tanımyn, ártúrli kezeńde olarmen sóılesip, suhbat aldym.
Irikteýden ótken 300 adamnyń 96-sy – memlekettik qyzmetshiler. Kóbi jeke sektordan qatysýshylar. Prezıdentimiz Qasym-Jomart Toqaev memlekettik qyzmettiń ashyq bolǵanyn qalap, qalyptasyp qalǵan stereotıpterdi buzǵysy kelse, iriktelgen 300 adam osy talaptarǵa tolyq saı keledi. Olar memlekettik qyzmettegi stereotıpterdi joıyp, memlekettik qyzmet salasyn ózgertetin jańa kóshbasshylar bolady degen úmitimiz bar.
Kadrlyq rezerv – el jastaryna kómek
Erlan SAIROV,
Eýrazııalyq ıntegrasııa ınstıtýtynyń dırektory:
– Bul – el jastaryna qoǵamdyq jáne áleýmettik kómek jasaýdaǵy negizgi qadamdardyń biri. Halyqtyń jartysynan kóbi jastar, biraq memlekettik jáne basqa organdarda olardyń úles salmaǵy az. Sondyqtan Prezıdenttiń bul qadamy jastar úshin kadrlyq ádilettilik ornatýǵa baǵyttalǵan dep oılaımyn. Prezıdenttiń jastar rezervine irikteý ádil ótti. Meniń oıymsha, endigi kezekte olardy Nur-Sultan men Almaty qalalaryna ǵana emes, aımaqtarǵa da jiberip, tájirıbeden ótkizgen durys.
О́zimizdi ártúrli qyrymyzdan kórsete aldyq
Dáýlet KÁRIBEK,
Nur Otan partııasy Jas Otan jastar qanatynyń tóraǵasy:
– Basty maqsat – Prezıdenttik kadrlyq rezervine ótken 300 adamnyń taǵaıyndalýy emes, memleketshil, otanshyl jastardyń jumys ótiline qaramaı, memlekettik ıdeıany júzege asyrýyna, memlekettik qyzmet isterine aralasýyna múmkindik berý. Prezıdenttik kadrlyq rezerv der kezinde jasaqtaldy. Sebebi 2050 jyly Qazaqstanda ómir súretin de, ony úzdik otyz eldiń qataryna engizýge tyrysatyn da – qazirgi jastar. Sondyqtan jastardy memlekettik qyzmetke tartýdyń osyndaı mehanızmderi jastar tarapynan jyly qabyldandy. Jastar da jobaǵa qatysýshy retinde ǵana emes, baǵyndyrar beles retinde, bilimi men tájirıbesiniń, biliktiliginiń synǵa túsetin kezeńi dep qarady. Bastapqy kezeńderi qıyn boldy, verbaldy test ońaı bolǵanymen, matematıkalyq test kúnde sheship júrmegendikten, qıynǵa soqty. Kelesi kezeńderde daıyndyqty kúsheıtip, ózimizdi jan-jaqty kórsetýge tyrystyq. Keı synaqtar oıyn túrinde ótti, aqparattyq joba qorǵadyq. Árbir tapsyrǵan testimizdiń beınekameraǵa jazylýy da irikteýdiń ashyqtyǵyn, ádildigin kórsetti. Osylaısha, úmitkerler árbir kezeńde ózin túrli qyrynan kórsete aldy.
