Aımaqtar • 26 Jeltoqsan, 2019

Tarazda 40 metrlik alyp «Saǵat» stellasy boı kóterdi

173 retkórsetildi

Elimizde tuńǵysh ret Taraz qalasynyń ortalyǵynan alyp saǵat boı kóterdi. Oblys ortalyǵyndaǵy «Kóne-Taraz» tarıhı-etnomádenı keshenindegi alańnyń ortasynda ornalasqan «Saǵat» stellasy elimizdegi eń bıik nysannyń biri sanalady.

Ol shahardyń kez-kelgen jerinen kózge kórinetindeı etip salynǵan. Stellanyń bıiktigi 40 metr bolsa, saǵattyń dıametri 4 metr. Stella Samarqan kirpishi men maıolık tasynan daıyndalǵan. Atalǵan «Saǵat» stellasy Reseıdiń Sankt-Peterbýrg qalasynda jasalǵan. Alyp saǵat tili Nur-Sultan qalasynyń ýaqyt ólshemimen birdeı júrip otyrady. Árbir saǵat saıyn qońyraý soǵylyp, zoraıtqysh dybyspen belgi beriledi.

Mundaı alyp saǵat álem elderiniń beldi qalalarynda bar ekendigi belgili. Máselen, Máskeýdegi Kremlde,  Londondaǵy Bıg-bende osyndaı saǵattar ornalasqan. Sonymen qatar, Mekke qalasynda bıik munaraly saǵattar da bar. Tarıhı Tarazdyń tańǵajaıyp kesheniniń aýmaǵynan boı kótergen «Saǵat» stellasy da kelýshilerdiń qyzyǵýshylyǵyn oıatyp, týrıster tartýǵa óz yqpalyn tıgizetin bolady. Alyp saǵat úsh bólikten turady. «Saǵat» qurylysynyń negizgi irgetasy tórt tuǵyrly bıik baǵanalarmen bekitilgen. Nysan orta ǵasyrlyq shyǵys úlgisinde árlengen.

Aıta ketý kerek, atalǵan stella ornatylǵan aýmaqta buryn jyr alyby Jambyl Jabaevtyń eskertkishi turǵan bolatyn. Keıin aqynnyń alyp eskertkishi óńirdiń bas ǵımaraty oblys ákimdiginiń aldyndaǵy alańshaǵa kóshirildi. Keıinnen bul orynǵa qandaı stella ornatýǵa bolatyndyǵy qala qurylysynyń keńesinde talqylanyp, saralandy. Keńes músheleriniń kópshiliginiń qoldaýymen atalǵan aýmaqqa «Saǵat» stellasyn ornatý týraly sheshim qabyldandy. Ondaǵy maqsat – Taraz eki myń jyldan astam tarıhy bar qala desek, keshendegi «Saǵat» stellasy ótken men búginniń jáne bolashaqtyń arasyndaǵy berik dánekeri, ǵasyrlar men dáýirlerdiń ólshemi ekendigin aıǵaqtaıdy.

 

Jambyl oblysy

Sońǵy jańalyqtar

Abaı murasyna arnalǵan kórme

Rýhanııat • Keshe

Jaǵa ustatqan jat qylyq

Aımaqtar • Keshe

Uqsas jańalyqtar