Memleket basshysy Qasym-Jomart Toqaev Armenııanyń Premer-Mınıstri Nıkol Pashınıanmen telefon arqyly sóılesti.
Taraptar Qazaqstan men Armenııa arasyndaǵy yntymaqtastyqty ekijaqty formatta da, Eýrazııalyq ekonomıkalyq odaq aıasynda da odan ári tereńdetýdiń ahýaly men perspektıvalaryn talqylady.
Armenııa Premer-Mınıstri Qazaqstan Prezıdentin kele jatqan Jańa jylmen quttyqtady. Qasym-Jomart Toqaev ta Nıkol Pashınıannyń memlekettik qyzmetine jańa jylda mol tabys, dostas armıan halqyna baq-bereke tiledi.
Sonymen qatar Memleket basshysy Qasym-Jomart Toqaev О́zbekstan Respýblıkasynyń Prezıdenti Shavkat Mırzııoevpen telefon arqyly sóılesti.
Áńgimelesý barysynda memleketter basshylary ekijaqty qarym-qatynastardyń qarqyndy damyp kele jatqanyn atap ótip, yntymaqtastyqty odan ári nyǵaıtýdyń perspektıvalaryn talqylady.
Sonymen qatar Qazaqstan Prezıdentiniń bıylǵy 14-15 sáýirde О́zbekstanǵa jasaǵan memlekettik saparynyń nátıjesinde qol jetkizilgen ýaǵdalastyqtardyń júzege asyrylý barysy qarastyryldy.
О́zbekstandaǵy Qazaqstan jylynyń tabysty ótkenine erekshe mán berildi. Onyń aıasynda mádenıet, óner jáne bilim salalary boıynsha yqpaldastyqty jandandyrý jóninde kóptegen shara uıymdastyryldy.
Qasym-Jomart Toqaev Shavkat Mırzııoevti kele jatqan jańa jylmen quttyqtap, oǵan memlekettik qyzmette tabys, baýyrlas ózbek halqyna baq-bereke tiledi.
Sondaı-aq Memleket basshysy Belarýs Respýblıkasynyń Prezıdenti Aleksandr Lýkashenkomen telefon arqyly sóılesti.
Memleketter basshylary Qazaqstan men Belarýs arasyndaǵy saıası, ekonomıkalyq jáne mádenı-gýmanıtarlyq baılanystardyń damý qarqynyn oń baǵalap, ekijaqty yntymaqtastyq máselelerin talqylady.
Taraptar Belarýstiń 2020 jyly Eýrazııalyq ekonomıkalyq odaq uıymyna tóraǵalyq etýine baılanysty eýrazııalyq ıntegrasııa aıasyndaǵy ózara is-qımyldardy odan ári damytý jóninde pikir almasty.
Prezıdentter bir-birin Jańa jylmen quttyqtady. Qasym-Jomart Toqaev Aleksandr Lýkashenkoǵa jaýapty memlekettik qyzmette tabys, dostas belarýs halqyna baq-bereke tiledi.
