Sýretti túsirgen Erlan OMAR, «EQ»
Jámıla AHMETOVA,
kóp balaly ana, Respýblıkalyq dıagnostıkalyq ortalyǵynyń ambýlatorlyq hırýrgııa bóliminiń medbıkesi:
– 2019 jyl elimiz úshin ártúrli jańalyqtarǵa toly boldy. Qaı ana úshin de balasynyń amandyǵynan asqan baılyq joq qoı. Kóp balaly analardy túsinemin, árqaısysy balasynyń amandyǵy, qaýipsizdigi, bolashaǵy úshin ýaıymdaıdy. О́zim – 6 balanyń anasymyn. Balalarymnyń úlkenderi jumys isteıdi, issaparǵa jıi shyǵady. Balanyń ósip, óz aldyna jumys isteýi, otbasy qurýy – zańdylyq. Osydan artyq ana úshin baqyt bar ma! Degenmen ana júregi qashanda alańdaýly. Jyldy qorytyndylaımyz dep jaqsy estelikterdi tizip júrgenimizde Almatydaǵy ushaq apaty týraly, onda sábıler men kishkentaı balalardyń bolǵanyn estip janymyz túrshikti. Keler jyldyń halqymyz úshin qaýipsiz, apatsyz, tótenshe jaǵdaısyz bolǵanyn tiler edim. Eldegi saıası ózgerister, demokratııaǵa qadam jasalyp, halyqpen dıalog ornatylyp jatqany, álbette, quptarlyq. Alaıda, munyń janynda el qaýipsizdigi umyt bolmasynshy degen tilegim bar. Saparǵa shyqqan árbir jolaýshy úıine aman-esen qaıtatyn, ár ana balasymen qýanyshta qaýyshatyn jyl bolǵaı.
Aýyt MUQIBEK,
qoǵam qaıratkeri:
– Biz ótkenge salaýat aıtyp, bolashaqqa úmitpen qaraımyz. Biz úshin 2019 jyl erekshe oqıǵalarmen este qaldy. Jyl sońy jaqyndap qalǵanda ushaq apaty bolmasa, ótken jylǵa ókpe joq. Bir sózben aıtqanda, 2019 jyl – Təýelsiz Qazaqstannyń jańa bir dəýirge qadam tastaǵan qutty jyly, tarıhı oqıǵaǵa toly ózgeristerimen tarıh qoınaýyna kirip barady. 2020 jyldan da kúter úmitimiz kóp, maqsatymyz da az emes. Biz saıası jańarý dəýirin bastadyq. Qudaıǵa təýbe, onyń alǵashqy qadamy sətti bastaldy dep tolyq senimmen aıta alamyn. Endi Prezıdent Joldaýynda alǵa qoıylǵan josparlar men talap-mindetter jəne Ulttyq qoǵamdyq senim keńesi usynǵan usynystar tolyq júzege asady dep senemin. Sebebi qazir bılik te, zııaly qaýym da sózden iske, jalpylyqtan góri naqtylyqqa kóshe bastady. Jurt ta sony talap etip otyr.
Jalpy, meni búginde halyq sanynyń azdyǵy erekshe tolǵandyrady. Endigi reformanyń basym bir baǵyty osy salaǵa – demografııa salasyna burylýy kerek dep esepteımin. Basqalaı aıtqanda, «toǵyzynshy terrıtorııada» alańsyz ómir súrý úshin halqymyzdyń sany da qomaqty bolýy abzal. Ázirge Qadyr Myrza Áli aıtpaqshy, «Kóp halyq joǵalmaıdy kóptigimen, myqty bolmaı bolmaıdy al bizderge!..»
Amalbek О́MIRTAI,
álemdik ekonomıka boıynsha PhD:
– «Qazaqstan-2030» strategııasy boıynsha «Azııa barysyna aınalý» qajettigi aıtylsa, endi 2050 jyly Qazaqstannyń damyǵan 30 eldiń qataryna enýi kózdelgen. Al 2050 jyly damyǵan elderdiń qataryna ený úshin, elimiz jyl saıyn 8-10 paıyz ekonomıkalyq damý kórsetkishterin kórsetýi tıis ekendigi árbir halyqaralyq ekonomıka mamanyna belgili. Biz sońǵy onjyldyqta bul kórsetkishterdiń jartysyna da jetken joqpyz. Aldaǵy onjyldyqta da jetýimiz ekitalaı. Ýaqytyly oryndalmaǵan tapsyrmalar, jańa jylǵa qoıylatyn mindetterdi eseleı beretindigi barshamyzǵa belgili. Sol sebepti árbir kórsetkish boıynsha esep alar kez jetti dep oılaımyn. Jalpy, 2020 jyldyń esep berer jyl bolýyn kútemin. Bizdiń ekonomıkamyz, ulttyq valıýtamyz, syrtqy saýdamyz da osy kúnge deıin shıkizattyq taýarlarǵa, ıaǵnı munaı-gazǵa, mysqa, ýranǵa, astyq eksportyna táýeldi bolyp keldi. Keler jyly sapaly eksportqa qol jetkizsek degen de oı bar. Úkimetke jańa lep beretin qabiletti azamattardyń kelýin kútemin. Jańa jylda elimizdiń óńirlik óndiristerin ózara ıntegrasııalap básekege qabiletti taýar óndirisin qalyptastyra alýymyzdy kútemin.
Jazyp alǵan
Svetlana ǴALYMJANQYZY,
«Egemen Qazaqstan»
