Ázirge Belarýs jaǵy janarmaı beketterinde tapshylyq joq ekenin, jaýapty organdar munaı óńdeý zaýyttarynda 2-3 aptaǵa jetetin qordyń baryn málimdedi. Resmı derekterge súıensek, Belarýs qory shamamen 0,5 mln tonna. Reseı óz sheshimin 1 qańtarda qabyldaǵan. Bir eskeretin jaıt, Reseıdiń Eýropaǵa Belarýs jeri arqyly júzege asatyn munaı tasymaly esh ózgerissiz jalǵasyp jatyr. Belarýs prezıdenti Aleksandr Lýkashenko 31 jeltoqsanda munaı kesheniniń basshylyǵymen jınalys ótkizip, jańa tasymaldaýshylardy tabý kerektigin aıtqan. Mamandar «Drýjba» qubyryn qaıtadan iske qosýdy nemese Baltyq porttarynan temir jol arqyly jetkizýdi usynǵan.
Negizinde eki el arasyndaǵy energııa kózderiniń tasymaly týraly 2017 jylǵy kelisimge sáıkes, seriktestik 2024 jylǵa deıin qarastyrylǵan. Bul qujat boıynsha Reseı Belarýske jylyna 24 mln tonna kóleminde munaı jetkizýi kerek. Kelisimdi ýaqytynan buryn toqtatýǵa eki el arasyndaǵy qarjylyq túsinispeýshilikter sebep bolýda. Máselen, 2019 jyldyń mamyr aıynda «Drýjba» qubyry Reseıden kelgen lastanǵan munaı saldarynan isten shyqty. Mınsk talap etken ótemaqyǵa Máskeý kelispeı, taraptar ortaq sheshimge kelmegen. Budan ózge salyq máselelerine de núkte qoıylmaǵan.
Aqparattarǵa súıensek, 31 jeltoqsanda eki el prezıdentteri telefonmen sóılesken. Kreml tarapy sheshimniń Belarýs úshin ońtaıly bolmaıtynyn aıtsa, Belarýs jaǵy buǵan qatysty túsinikteme bermedi. Degenmen, Reseı gazdyń baǵasyn byltyrǵy baǵany ósirmeı, myń tekshe metrine 127 dollar alýǵa kelisimin berdi.
Reseı men Belarýs arasynda «munaı soǵysy» 2006-2007, 2016 jyldary da bolǵan. Eki shıelenis te beıbit kelisimmen aıaqtalǵan edi. Alaıda aqparat kózderi bul joly Belarýs prezıdenti ashýly ekenin jazady. Sarapshylar A.Lýkashenkonyń «Mundaı odaqtyń qajeti joq» degeni tegin emes deıdi.
