Aımaqtar • 06 Qańtar, 2020

Eline búıregi burǵandardyń eńbegi janady

16 retkórsetildi

Atbasardyń Atymtaı jomarty atanǵan «Shýıskoe-HHI» jaýapkershiligi shek­teýli seriktestiginiń bas­shysy Altynbek Qur­man­qulovtyń aýyldasta­ryna jasap otyrǵan qam­qorlyǵy talaılar tamsanyp aıtatyn ádemi ańyz ispetti. 130 mıllıon teńgege jergilikti mańyzdaǵy joldy jóndegen. Bilim oshaǵyna, kóp balaly analarǵa, áleýmettik nysandarǵa mıllıondaǵan qarjy bólip otyr. Az qam­tylǵan jerlesterin júrek jylýymen jylytyp otyr­ǵan aqedil jannyń ıgilikti is-áreketi ózgege ónege, ómir­sheń úlgi.

Aýyldyq okrýgke qarasty Shýıskoe, Makeevka, Tretıakovka eldi mekenderi mun­tazdaı taza jınaqylyǵymen, ba­qýat­ty tirshiligimen erekshelenedi. Shýı­skoe aýylynda dárigerlik ambýlato­rııa, mádenıet úıi, kitaphana, poshta bó­lim­shesi múltiksiz jumys istep tur.

Okrýgte «Shýıskoe-HHI», «Álem 777», 9 sharýa qojalyǵy, on shaqty jeke ká­sipker jumys isteıdi. Osy ujym­dardyń ishinde týǵan ólkeniń tósin kór­keıtýge, okrýgtegi aýyldardyń ajaryn keltirip, shyraılandyrýǵa tolymdy úles qosyp jatqan «Shýıskoe-HHI» se­rik­testiginiń basshysy Altynbek Qur­manqulovty bóle-jara ataýǵa bolady. Altynbek Beısembekuly bıylǵy jyl­dyń ózinde Shýıskoe aýylynan Makeevkaǵa baratyn 8 shaqyrym tas joldy 13 mıllıon teńgege jóndep berdi. Ja­qyn da bolsa alys jol edi. Segiz sha­­qyrymnyń ózi sileńdi qatyryp, ser­geldeńge túsiretin. Qazir atqan oqtaı túp-túzý joldyń rahatyn kórip otyrmyz, deıdi eki eldi mekenniń turǵyndary.

Seriktestik 23 423 gektar jerge dán­di daqyldar tuqymyn sebedi. Bul ól­keniń topyraǵy óte qunarly. «Je­tek shanshysań, arba ósip shyǵady» deıtin­deı-aq maıy betine shyǵyp turǵan jer. Arqadaǵy aýa raıy anaý aıtqandaı qo­laı­ly bola qoımaǵan jyldardyń ózinde gektar berekesin 15 sentnerden aınaldyrady. Agrotehnıkalyq sharalardy ýaqtyly atqarýdyń, ortaq iske kúsh-qýattaryn, qaırat-jigerlerin aıamaı jumsaýdyń jemisi. О́ıtkeni aýyl eńbekkerleri nátıjeli eńbek etse ıgiligin ózderi kóretinin jaqsy biledi. Bul jerde arqany keńge salyp júrdim-bardym jumys isteý joq. Sharýashylyqtyń qaı isine bolsyn qaıraqqa janyp alǵandaı qylpyp turatyn besaspap mamandar belderin bekem býyp kirisip ketedi. Serik­testik dıqandary bıyl da dittegen mejege jetti. Kúzdiń qara jańbyrymen alysyp júrip mańdaı termen ósken dánniń bir túıirin ysyrap qylmaı, qambalaryna quıyp aldy. Bıdaıdyń ár gektarynan 14,7 sentnerden ónim jınasa, arpanyń shyǵym­dylyǵy ár gektaryna 18,2 sentnerden aınaldy. Seriktestik jalǵyz egin sharýashylyǵynyń yryz­dyǵyn emip qana qoımaı, mal sharýa­shylyǵyn damytýǵa da kúsh salýda. Maý­symdyq jumystarmen shektelse, aýyl turǵyndaryn qysy-jazy qol úzbeı isteıtin jumyspen qam­tamasyz ete almas edi. Onda tabystyń taıqa­zany da dál osylaı qaınamaıdy. Jumys­shylardyń da eńbekaqysy taqyl-tuqyl bolar edi. Al qazir qaı ýaqytta da qol qýsyryp qarap otyratyn adam taba almaısyz.

Baǵymda 710 iri qara bar, jylqynyń sany 500-ge jýyq. Jyl ishinde 13 tonna et óndirip, 1340 tonna sút saýǵan. Serik­testik jumysshylarynyń aılyq jalaqysy ortasha eseppen 116 000 teń­geni quraıdy. 120-ǵa jýyq adam qysy-jazy jumyspen qamtylyp otyr.

Táp-táýir dáýlet jınaǵan seriktestik bar tabysyn baýyryna basyp qalmaı, el qamyn jep otyrǵanyn kórgende kóziń súısinip, kóńilińdi qýanysh bıleıdi. О́zge jerlerdegi órender de el qamyn Altyn­bek Beısembekuly tárizdi oılaı júrse ǵoı.

Aýyldy abattandyrýǵa, kóshet otyr­ǵyzýǵa, jaryqtandyrýǵa 20 mıllıon teńge qarajat bólipti. Aýyldaǵy orta mek­teptiń ashanasyn jóndep, órt­ke qarsy qurylǵylar ornatýǵa 300 myń teńge bergen. Mádenıet úıiniń kór­­kemónerpazdar úıirmesiniń múshe­lerine qajetti árqıly kostıýmder men basqa da qural-jabdyqtar satyp alýǵa 570 myń teńge kóleminde kómek kórsetken. Kóp balaly analar men Aýǵan soǵysynyń ardagerlerine, sondaı-aq «Mektepke jol» aksııasy boıynsha qajetti sharýalarǵa 2 908 myń teńge jum­saǵan. Aýyl turǵyndarynyń aıtýyna qaraǵanda, seriktestiktiń sharapaty tıgeli oqta-tekte boı kórsetip qalatyn basbuzarlyq ta pyshaqpen sylǵandaı sap tyıylǵan. Kórshiniń ketpenin qoltyǵyna qysa ketetin qo­ly suǵanaqtar da aıaqtaryn tarta bastapty. О́ıtkeni aýyldyń tórt tarabyn tegis beınebaqylaý júıesi kir­pik qaqpaı qadaǵalap tur. Bul oraıda se­riktestik 1 238 myń teńge qarajat jum­­saǵan. Eń bastysy, beınebaqylaý da emes, adamdardyń ımandy sezimderi qa­lyptasyp, arly adaldyqtyń bastaýy negizin qalaǵan. Mektep oqýshylarynyń ys­tyq aspen qamtamasyz etilýine 888 myń teńge kóleminde kómek kórsetken.

Bul ólkede kópten beri kúrmeýi she­shil­meı kele jatqan máseleler de barshylyq. Onyń biri – jol men aýyz sý. Seriktestik okrýg aýmaǵyna kiretin jol­dardy 130 mıllıon teńgege jóndep bergen. Aýyz toltyryp aıtatyn-aq qam­qorlyq emes pe?! El ishinde oty­ryp jerdiń ıgiligin kórgen soń qaıta­rymyn jerlesterim kórsin degen aq adal nıettiń nátıjesi desek, artyq aıtqandyq emes shyǵar. Aýyldastaryna aqjarylqap kóńilmen demeý bolyp otyrǵan seriktestik jumysshylaryna da táp-táýir jaǵdaı jasaıdy. Máselen, seriktestik jumysshylaryn tegin tamaq­tan­dyrýǵa 2 054 myń teńge qarajat bólse, zeınetkerlerge 1 182 myń teńge kóleminde kómek kórsetipti.

San qyrly sharýanyń basyn birik­tirip, ıgilikti isterge uıytqy bolyp otyrǵan seriktestikke besaspap maman kadrlar da kerek. Shetten kimdi ákelersiń, qaı istiń mamany bolsyn óz ortasynan shyǵady. Biraq olardy talapqa saı bolýy úshin qaıta daıarlap, oqytý kerek. Daıarlyqty tileıtin jumys ta az emes. Máselen, seriktestik jyl saıyn mashına-traktor parkin jańartyp, sheteldik ónimdi tehnıkalardy aldyrýda. Basqa da qajettilikter jetip-artylady. Búgingini ǵana oılamaı, keleshektiń kókjıegine qadam basýdy murat tutqan ujym bir mıllıon teńgege mamandardy qaıta oqytyp daıarlaǵan.

– Selodaǵy bir zeınetker áldebir sebeptermen paıyna tıesili astyǵyn ala almaǵan eken, – deıdi okrýg ákimi Ásııa Toqjumanova, – Altynbek Beısem­bekulymen habarlasyp edim, sózge kel­gen joq, tıesili astyǵyn berdi. Bas­qa ýaqytta da buıymtaıyn aıtqan jer­lesteriniń betin qaıtaryp kórgen emes.

El tegi osyndaı erlerdiń arqasynda eńse túzemek.

 

Aqmola oblysy,

Atbasar aýdany

Sońǵy jańalyqtar

Elbasy Túrkııa halqyna kóńil aıtty

Qazaqstan • Búgin, 14:17

Elektiń sory – alty valentti hrom

Ekologııa • Búgin, 14:05

BQO polısııasy 440 otbasyn tekserdi

Aımaqtar • Búgin, 13:20

Túrkııada jer silkinisi boldy

Álem • Búgin, 10:14

Qyzylorda: Qazalydaǵy qonys toı

Aımaqtar • Búgin, 09:07

Uqsas jańalyqtar