Qazaqstan • 06 Qańtar, 2020

Infeksııaǵa qarsy preparattar ǵylymı ortalyǵy GMP sertıfıkatyn ıelendi

84 retkórsetildi

«Infeksııaǵa qarsy preparattar ǵylymı ortalyǵy» AQ GMP sertıfıkatyn ıelendi. Bul qujat ónimniń sapasyna, onyń turaqty tekserilýine jáne óndiristiń álemdik standarttarǵa sáıkestigine kepildik beredi. Bul týraly Indýstrııa jáne ınfraqurylymdyq damý mınıstrliginiń baspasóz qyzmeti habarlady.

GMP (Good Manufacturing Practice) – bul dárilik preparattardy, bıologııalyq belsendi qospalardy, taǵamdyq qospalardy jáne keıbir tamaq ónimderin óndirýge qoıylatyn talaptardy anyqtaıtyn halyqaralyq standart. GMP halyqaralyq standartyna óndirýshi kásiporyn jaýap berýi tıis barlyq talaptar engizilgen: óndiristik sehtaǵy temperatýradan bastap qyzmetkerlerdiń kıimine deıin.

2018 jyldyń 1 qańtarynan bastap GMP standarttary qazaqstandyq óndirýshiler úshin mindetti dep tanyldy.

Ǵylymı ortalyqtyń GMP sertıfıkatyn ıelenýi barlyq ujymnyń jemisti jáne úılesimdi jumysynyń nátıjesi bolyp tabylady. Ortalyq qyzmeti jańa medısınalyq preparattardy ǵylymı izdestirýge jáne synaýǵa baǵyttalǵan segiz beıindi zerthanada júzege asyrylady. Ortalyqtaǵy synaqtardy tútikshede, sondaı-aq, tiri aǵzalarda zertteý júrgizýge múmkindik bar. Ǵylymı ortalyqtyń qyzmetkerleri álemniń 12 elindegi 38 uıymmen áriptestik qarym-qatynas ornatyp,únemi tájirıbe men bilim almasady.

Búgingi tańda «Infeksııaǵa qarsy preparattar ǵylymı ortalyǵy» AQ-da ınfeksııaǵa qarsy jańa tórt preparat ázirlenýde:

  • FS-1 týberkýlezge qarsy preparaty - ókpe týberkýleziniń mýltırezıstenttik túri bar naýqastarǵa klınıkalyq synaqtardyń úshinshi fazasy júrgizilýde;
  • Antıbıotıkterdiń potensıatory (PA) - klınıkalyq synaqtardyń birinshi fazasy júrgizilýde;
  • Interferondar ındýktory ( IF) - klınıkaǵa deıingi synaqtar júrgizilýde;
  • Keń spektrli áser etetin ımmýnomodýlıator (IM) - klınıkaǵa deıingi synaqtar júrgizilýde.1

Uqsas jańalyqtar