Olar Jambyl aýdanyndaǵy Aıtýar aýylynan toǵyz shaqyrym qashyqtyqta qar qursaýynda qalǵan. Qalyń qar joldy jaýyp tastaǵan, aq boran kólikterdi de kómip qoıǵan.
Qudaıǵa shúkir, qazir áıteýir qaltafondyq baılanys bar ǵoı. Jolaýshylar sonymen tótenshe jaǵdaı jónindegi qyzmetke qońyraý shalǵan. Kóz ashyrmas boranda jolaýshylardy qutqarý jóninde buıryq alǵan sol mańdaǵy Arhangelka aýyldyq okrýgynyń polısııa ınspektory, kapıtan Atyǵaı Temeshev jedel qımyldap, qutqarý operasııasyn utymdy uıymdastyrdy. Aýyldyq okrýgtyń ákimi Altyn Tashenovamen birge olar «jedel járdem» mashınasyn jáne traktor alyp, júrgizýshilerVladımır Borısov pen Artem Sýrov – bári batyp turǵan kólikterdi taýyp, qar qursaýynan qutqaryp, bara jatqan Blagoveshenka selosyna deıin shyǵaryp salǵan. «Mundaı jaǵdaıda aýyldyqtardyń uıymshyldyǵy, qaıyrymdylyǵy septigin tıgizedi, olar qoldan kelgen kómekterin aıamaıdy. Eń bastysy adamdardyń úsip qalýyna jol berilmedi. Kóliktegi jolaýshylardyń arasynda balalar da boldy», - deıdi Atyǵaı Temeshev.
Osyndaı jaǵdaı Esil aýdanynda da boldy. «Mısýbısı Padjero» kóligimen 14 jasar balasyn ertip balyq aýlaýǵa barǵan balyqshy kenetten soǵyp ketken borannyń astynda qalyp, kóldiń jaǵasynan shyǵa almaı qalǵan. Bulardy úsip ketýden mobıldik baılanyspen jetken habar boıynsha jedel kómekke jetken polısııa qyzmetkerleri Danııar Jaqypov, Nursultan Aýshahmanov jáne Denıs Voısehovkıı jergilikti JShS-niń traktorshysy Denıs Belıakovty alyp baryp, qar qursaýynan qutqaryp aldy.
