Onlaın tirkelý úshin azamat http://egov.kz saıtyna ótinish jasap, «Medısınalyq kómek» bóliminde «Alǵashqy medısınalyq-sanıtarlyq kómek kórsetetin medısınalyq uıymǵa tirkelý» qyzmetin tańdaýy qajet. Odan soń «Qyzmetke onlaın tapsyrys berý» túımesin basý kerek. О́tinish sátti joldanǵannan keıin portalda «Suranys óńdelýde» mártebesi paıda bolady.
Emhananyń úıden, jumystan 15-20 mınýt jaıaý júretin jerde ornalasqany jón. Bul dárigerlerge qajet bolǵan jaǵdaıda úıińizden jedel kómek kórsetýge, búkil otbasyńyzben bir dárigerge qaralýǵa múmkindik beredi. Sonymen qatar turǵylyqty jer boıynsha emhanaǵa Telegram bot arqyly tirkelý múmkindigi bar, ol úshin Telegram messendjerinde @Kenes1414Bot-qa jazylyp, qarapaıym tirkeýden ótip, ary qaraı qyzmet túri: medısınalyq uıymǵa messendjer arqyly tirkelýdi tańdap, emhanany tańdaý qajet. Qyzmetti kórsetý merzimi – 1 jumys kúni.
Botpen jumys jasaýdy bastaý úshin eGov.kz-ke tirkelgen bolyp, uıaly telefonnyń nómirin portaldyń profıline baılanystyrý qajet. Telefondy tirkeý jáne baılanystyrý ESQ paıdalana otyryp júzege asyrylady.
Sonymen qatar iKOMEK109 biryńǵaı baılanys ortalyǵyna habarlasyp, azamattyń qalanyń belgili bir emhanasyna tirkelgeni týraly aqparat alýǵa bolady.
