Qazaqstan • 07 Qańtar, 2020

Aqtóbelik hokkeıshiler qar qursaýynan qutqaryldy

255 retkórsetildi

Soltústik Qazaqstan oblysynyń batys shekarasyn basyp, Aqtóbe oblysynyń hokkeı komandasyn alyp bara jatqan «Neoplan» atty avtobýs «Tımırıazev-Sarykól» tas jolynyń 18 shaqyrymynda bıik joldan taıyp ketip, 6 saǵat boıy qar qursaýynda qalǵan. Avtobýsta komandanyń barlyq 28 hokkeıshisi bolǵan.Júrgizýshi bıik qar atjaldarynan aınalyp ótpek bolǵanda joldan túsip ketken eken.

Polısııanyń kezekshi bólimine túsken dabyldan oqıǵa ornyna «QazAvtoJol» UK AQ 2 arnaıy tehnıkasy, aýdandyq polısııa bóliminiń aǵa ınspektory, polısııa aǵa leıtenanty Dáýlet Saýyt sýyt jetedi. Kóp uzamaı olarǵa Tótenshe jaǵdaılar qyzmetkerleri men aýdan ákiminiń orynbasary Azamat Ysqaqov jáne t.b. qosylady.

Joldy jaýyp qalǵan qalyń qardan avtobýsqa jetý úshin birneshe saǵat  ketedi. Alaıda hokkeıshiler otyrǵan avtobýs ot alyp turǵandyqtan peshi jaqsy istep, salonda uzaq ýaqyt bolsa da jolaýshylar sýyqqa shaldyqpaǵan.  Aýdandyq polısııa bóliminiń kezekshi bólimi de júrgizýshimen baılanysty toqtatpaǵan.

Tańerteńnen kúndizgi saǵat 12-ge deıin turǵan avtobýsqa qar tazalaýshy tehnıka zorǵa jetip, aqtóbelik sportshylar qar qursaýynan aman-esen qutqaryldy. Aldymen olar aýdan ortalyǵy Tımırıazevo selosyna jetkizilip, tamaqtandyryldy. Osydan keıin olar Petropavl qalasyna attanady. Qutqarý jumystarynda negizgi belsendilik polısııa qyzmetiniń tarapynan bolǵanyn atap ótý kerek.

Uqsas jańalyqtar