Rýhanııat • 09 Qańtar, 2020

Jastardyń ana tilin bilýine basa mán bergen jón – Q.Toqaev

207 retkórsetildi

Memleket basshysy Qasym-Jomart Toqaev «Egemen Qazaqstan» gazetiniń búgingi sanynda jaryq kórgen «Abaı jáne XXI ǵasyrdaǵy Qazaqstan» atty maqalasynda uly oıshyl qara sózderiniń birinde dáriptegen til úırenýdiń ıgiligine toqtala kele, ana tildiń mártebesin arttyrý kerektigin alǵa tartady.

«Abaı aıryqsha dáriptegen ıgilikti istiń biri – til úırený. Aqyn jıyrma besinshi qara sózinde ózge tildiń adamǵa ne beretinine toqtalyp: «Árbireýdiń tilin, ónerin bilgen kisi onymenen birdeılik daǵýasyna kiredi, asa arsyzdana jalynbaıdy», – deıdi. Demek, ózimizden ozyq turǵan jurtpen deńgeıles bolý úshin de onyń tilin meńgerýdiń mańyzy zor» delingen Prezıdent maqalasynda.

Q. Toqaev jas urpaq ózge tildi jetik meńgerip, óz tilin qurmettese ult ıgiliginiń artatynyna senim bildirdi.

«Al qazirgideı jańa tarıhı jaǵdaıda bárimiz ana tilimizdiń damýy men dáriptelýine nazar aýdaryp, onyń mártebesin arttyrýymyz kerek. Sonymen qatar aǵylshyn tilin úırenýge de basymdyq berý qajet. Jastarymyz neǵurlym kóp tildi meńgerse, soǵurlym múmkindigi keńeıedi. Biraq olardyń ana tilin bilýine basa mán bergen jón. О́skeleń urpaq, Abaı aıtqandaı, ǵylymdy tolyq ıgerse, óz tilin qurmettese ári shyn máninde polıglot bolsa, ultymyzǵa tek ıgilik ákeleri sózsiz» dep jazdy Prezıdent. 

Sondaı-aq maqalada til úırenýmen qatar, jahandaný zamanynda sananyń ashyqtyǵyn qamtamasyz etýdiń mańyzdylyǵy aıtylǵan.

«Qazir álem kún saıyn emes, saǵat saıyn ózgerýde. Barlyq salada jańa mindetter men tyń talaptar qoıylýda. Ǵylymdaǵy jańalyqtar adamdy alǵa jeteleıdi. Aqyl-oımen ǵana ozatyn kezeń keldi. Zaman kóshine ilesip, ilgeri jyljý úshin biz sananyń ashyqtyǵyn qamtamasyz etýimiz kerek. Bul qadam órkenıettiń ozyq tustaryn ulttyq múddemen úılestire bilýdi talap etedi. Mundaı kezde ózimizdiń taptaýryn, jadaǵaı ádetterimizden bas tartýymyz qajet» degen joldar Memleket basshysynyń maqalasynda kezdesedi.  

Uqsas jańalyqtar