Oftolmoskop jáne otoskop. Endi jalpy praktıka dárigerleriniń dál osyndaı quraldary bar. Aq halattylar otolarıngolog pen okýlısterden bilim alyp, ony praktıka júzinde qoldanbaq. Mundaı tájirıbe Máskeýden alyndy.
–Myna qurylǵy otoskop dep atalady. Ol arqyly biz qulaq aýrýlaryn anyqtaımyz. Munda ár túrli ólshemder bar. Iаǵnı balaǵa da, úlkenge de qoldanýǵa bolady. Balalar men eresekterdiń kóz túbin zertteý ádisi oftolmoskop dep atalady. Myna qural pıkfloýmetr dep atalady. Ol keýdeni tekserýge arnalǵan. Biz balalardyń tamyryn tekserip, bir jasqa deıingi sábılerdiń tynys alý jıiligin anyqtaımyz,–deıdi jalpy praktıka dárigeri Aıdana Júnisbekova.
Mamandardyń aıtýyna qaraǵanda, jańa qural-jabdyqtarmen qamtamasyz etilgennen keıin medısınalyq tekseris burynǵydan áldeqaıda naqtylana túspek. Demek, em tez qonady degen sóz.
– Bizdiń bólimshelik medbıkelerge de arnaıy sómkeler qarastyrylǵan. Onyń ishinde tarazy, boıdy ólshegish, jańa týǵan sábılerden bastap, 5 jastan asqan balalarǵa arnalǵan manjetter bar, – deıdi qalalyq emhana bóliminiń meńgerýshisi Armıne Toroıan.
Jańa medısınalyq jabdyqtardyń kómegimen endi jalpy praktıka dárigerleri tar beıindi mamandardyń kómeginsiz ózderi-aq dıagnostıka jasaı alady. Osylaısha jalpy sany 60 medısınalyq sómke satyp alyndy. Bul «birinshi baılyqqa» jasalǵan zor qamqorlyq.
Kókshetaý qalasy
