Búgin, Premer-Mınıstrdiń birinshi orynbasary, О́ńirlik damý mınıstri Baqytjan Saǵyntaev Qyzylorda oblysynda arnaıy jumys saparymen boldy. Onymen birge bolǵan Qorshaǵan ortany qorǵaý mınıstri Nurlan Qapparov, Aýyl sharýashylyǵy mınıstriniń orynbasary Marat Tolybaev, Ekonomıka jáne bıýdjettik josparlaý vıse-mınıstri Marat Qusaıynov jáne birqatar memlekettik organdardyń ókilderi óńirde atqarylyp jatqan jumys barysymen tanysty jáne «Baıqońyr» ǵarysh aılaǵynyń búgingi ahýalyn kózben kórdi. Bul týraly «QazAqparat» agenttigi habarlady.
Olar aldymen Aral teńiziniń soltústigindegi Kókaral bógetine keldi. Osy jerde jergilikti bılik ókilderi «Syrdarııa ózeni arnasyn retteý jáne Soltústik Aral teńizin saqtap qalý» (SARATS) jobasy aıasynda atqarylǵan jáne aldaǵy ýaqytta júzege asyrylatyn jumystar týraly habardar etti. Bul jobanyń ekinshi kezeńi boıynsha Qyzylorda sý torabynyń sol jaǵalyq rettegish shlıýzin, Qazaly jáne Qarmaqshy aýdandaryndaǵy qorǵanys bógetterin qalpyna keltirý, Syrdarııa ózeniniń Qorǵansha jáne Turymbet ýchaskeleri tusyndaǵy arnasyn túzetý, Qazaly aýdanynyń Birlik aýyly janyndaǵy avtojoldaǵy kópirdi jóndeý, Qamystybas jáne Aqshataý kólder júıesin jańǵyrtý, Qamystybas pıtomnıginiń Tastaq ýchaskesindegi toǵan sharýashylyǵyn keńeıtý sekildi jumystardy atqarý josparlanǵan. Naqty kezeńde 6 baǵyt boıynsha ázirlengen tehnıkalyq-ekonomıkalyq negizdeme memlekettik qurylys saraptamasy qaraýyna usynyldy. Sonymen birge, SARATS jobasynyń birinshi kezeńin júzege asyrý boıynsha Aral teńiziniń soltústik bóligin jańǵyrtý jáne onyń tehnıkalyq-ekonomıkalyq negizdemesin qaıta qaraý, Syrdarııa ózeni basseıniniń qazaqstandyq bóligin sý resýrstarymen qamtamasyz etýdi jabdyqtaý jumysy jalǵasýda. Ortalyq memlekettik organ ókilderi osy isterdiń barysymen tanysyp bolǵannan soń, Aral balyq óńdeý zaýyty men Áıteke bı kentindegi «Rza» AQ sút ónimderin óńdeý zaýytynda boldy.
Premer-Mınıstrdiń birinshi orynbasary bastaǵan delegasııa kelesi kezekte «Baıqońyr» ǵarysh aılaǵyna aıaldap, osyndaǵy «Gagarın starty» ortalyǵyn, murajaı kesheni men Tóretam kentindegi emhanalardy aralap kórdi. Odan ári osy aılaqta kóshpeli májilis ótkizilip, onda zymyran tasyǵyshynyń qulaǵan ornyn qalpyna keltirý men zalalsyzdandyrý máselesi qaraldy. Májiliste Qyzylorda oblysynyń ákimi Qyrymbek Kósherbaev «Baıqońyr» ǵarysh aılaǵynda bolǵan apattyń jergilikti turǵyndardyń densaýlyǵyna áser etip jatqanyn málimdedi. Osyǵan oraı ekologııalyq ahýaldy baqylaıtyn turaqty monıtorıng júrgizý qajettigin alǵa tartty.
Ámirhan Almaǵanbetov.
