Abaı óz zamanynda qazaqty el qylýdyń qarmana qamyn jasasa, onyń árbir sózi tasqa qashalǵandaı bolashaqtyń aldynan kún ótken saıyn árlenip shyǵa beretinine kári ýaqyt kýá. «Ulttyq bolmystyń úlgisi», «Memleket isiniń múddelesi», «Jańa qoǵamnyń janashyry», «Álemdik mádenıettiń tulǵasy»...
Bul taqyrypshalardaǵy órilgen oılar almaǵaıyp zamanda rýhanı jańǵyrýlar men ulttyq sananyń sony bir serpilisin qajetsingen osynaý bir qazaq qoǵamyna aqyn sózin jetkizýdi maqsat etken. Abaı zamanynyń qazaǵy búgin qandaı? Sol qara sózdiń qasıeti aıtqan synnan nátıje shyǵardy ma, álde qalyń eli, qazaǵy, qaıran jurtynyń bolashaǵy buldyr tartyp bara ma?
«Abaıdy taný – adamnyń ózin-ózi tanýy... Biz eldi, ultty Abaısha súıýdi úırenýimiz kerek... Áleýmettik jaýapkershilikti Abaıdyń «tolyq adam» formýlasynan izdegen jón. Nege qazaqtyń bitim-bolmysyn, mádenıetin Abaı arqyly tanytpaımyz?.. Abaıdy ultymyzdyń mádenı kapıtaly retinde nasıhattaýymyz kerek...» degen maqaladaǵy soqtaly oılarǵa asa mán berip, ár qazaqtyń boıyna Abaıdyń sózin uıalata alsaq, aldaǵy ýaqytta qazaqty úlken ushpaqqa shyǵarary haq.
Baýyrjan ERDEMBEKOV,
Q.Jubanov atyndaǵy Aqtóbe óńirlik
memlekettik ýnıversıtetiniń rektory, professor, abaıtanýshy
