Qaýipsizdik belbeýinen shyǵyp ketken balanyń bıiktikten quldılaı qulaǵany beınelengen beınejazba jelide jeldeı júıtkip taraǵan edi. Málim bolǵandaı, «Katapýlta» attraksıonyna mingen 14 jastaǵy jetkinshektiń omyrtqa men sol jaq bilek súıegi, on jaq taban súıegi men sol aıaǵynyń tobyǵy synǵan.
Alǵashynda zardap shekken oqýshynyń jaqyndary bolǵan oqıǵaǵa baılanysty eshkimge shaǵymdanbaıtynyn, sebebi balanyń attraksıonnan ańdaýsyzda qulaǵanyn jetkizgen edi. Degenmen PD baspasóz qyzmeti taratqan habarda týystarynyń túsiniktemesine qaramastan, Medeý aýdany polısııa basqarmasy Qylmystyq kodekstiń 306-baby, ıaǵnı «Qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý» isi boıynsha sotqa deıingi tergeý amaldaryn tirkegeni málim boldy.
Zardap shegýshi em alyp jatqan Balalarǵa shuǵyl medısınalyq kómek kórsetý ortalyǵynyń bas dárigeri Abaı Qusaıynov, jasóspirimniń kóp jeri synǵanyn, jaǵdaıy ortasha aýyr dep baǵalanyp otyrǵanyn jetkizdi. Atap ótilgendeı, bala salalyq travmatologııalyq bólimshede jatyr, tolyq esin biledi, týystarymen sóılese alady. Naýqasqa qajetti medısınalyq kómek tolyq kólemde kórsetilgen.
Bastysy, bul oqıǵadan zardap shekken bala aman qaldy. О́tken jyldyń jaz aıynda Qaraǵandydaǵy tosyn jaǵdaıdan órimdeı ul kóz jumǵany, elordadaǵy oıyn alańdarynyń birindegi úrlemeli batýttan qulaǵan bes birdeı jetkinshek aýyr jaraqat alǵany belgili. Qalaı bolǵanda da bul salǵyrt qaraıtyn másele emes. Aıdyń, kúnniń amanynda bolashaǵynan úmit kútip otyrǵan óreninen kóz jazyp qalý ata-ana úshin aýyr qasiret.
Byltyr Investısııalar jáne damý mınıstrligi elimizdegi attraksıondardaǵy qaýipsizdik máselesi qatań qadaǵalanatynyn tilge tıek etken edi. 2018 jyldyń 18 sáýirinen Eýrazııalyq ekonomıkalyq odaqtyń «Attraksıondardyń qaýipsizdigi týraly» tehnıkalyq reglamenti kúshine enip, bul turǵyda ulttyq standart qurylǵan bolatyn. Qujat adamdardyń ómiri men densaýlyǵyn, eń aldymen balalardy qorǵaýǵa ázirlengen. Onda oıyn átkenshekteriniń qaýipsizdigi, ony iske qosýdy josparlaý, tıisti standarttardy qoldaný qatań kórsetilgen. Qujatqa sáıkes attraksıondy iske qosýda, ornatýda jaýapty mamandar bolýǵa tıis. Attraksıon ıesi qurylǵyny jergilikti atqarýshy bılik organdaryna tirkeýi kerek. Sondaı-aq kásipkerlerge ótken jyldan bastap tek EEO-nyń sertıfıkaty bar qurylǵylardy ǵana satyp alýǵa ruqsat berilgen.
Qoǵam belsendisi Ashat Asylbekov, atalǵan taqyrypqa qatysty óz oıyn jetkizdi. «Bala bizdiń bolashaǵymyz dep jatamyz. Endeshe bul máselege salǵyrt qaramaýymyz qajet. Árbir attraksıonnyń tehnıkalyq jaǵdaıyn kórsetetin qujaty bolady. Osy qujattar únemi tekserilip otyrýy shart. Kóp jaǵdaıda kásipkerler paıdany kóbirek oılap, tozyǵy jetken quraldardy der kezinde aýystyrýǵa salǵyrt qaraýy múmkin. Tili joq tehnıka kez kelgen ýaqytta syr berýi ǵajap emes. Qıyn jaǵdaıda kináni jel men jańbyrǵa jaýyp qoımaı, sonymen tabys taýyp otyrǵan adamdar qoǵam aldyndaǵy jaýapkershiligin sezinýi tıis. Sondyqtan qurylǵylarǵa sertıfıkat bererde, tekserý jumystarynda jaýapty mekemeler jaýapkershilik tanytqany abzal», deıdi ol.
Tabysty bıznestiń biri sanalatyn attraksıondaǵy keleńsiz oqıǵalardan álemde jyl saıyn qanshama adam ajal qushýda. Bul jaǵdaılardan sabaq alyp, oıyn-saýyqtyq qurylǵylardyń qaýipsizdigi qatań qadaǵalansa ıgi. Aıtqyzbaı keler apatqa eshkimniń de tosqaýyl bola almasy anyq, alaıda qarapaıym ǵana tehnıkalyq erejeni eskermeýdiń saldarynan bolyp jatqan mundaı oqıǵalar budan bylaı qaıtalanbasa deısiń.
ALMATY
