Nátıjesinde, arnaýly oqý oryndarynda sabaqty úzdik oqıtyn stýdentterdiń shákirtaqysy 19 272 teńgeden 24 090 teńgege deıin ósse, basqa sanattaǵy bilimgerlerdiń de 16 759 teńge stıpendııasy 20 948 teńgege deıin joǵarylady. Sondaı-aq joǵary bilimdi bakalavrıat jáne magıstratýra júıesi boıynsha alatyn stýdentterge tólenetin stıpendııa mólsheri de artady. Buǵan deıin bakalavrıattaǵy stýdent 20 949 teńge shákirtaqy alsa, endi bul 26 186 teńgege deıin ósedi. Al magıstr-bilimgerge 53 530 teńge tólense, ol kóbeıe kele 66 913 teńgeni quramaq. Munan bólek, doktorantýrada bilimin shyńdaıtyn bolashaq ǵalymdar úshin de qýanyshty jańalyq bar. Máselen, jas izdenimpaz buryn 81 998 teńge shákirtaqy alsa, endi 102 498 teńgege deıin ulǵaıady.
Bul jańalyqty Taldyqorǵan qalasynda oryn tepken mańdaı aldy oqý orny – Jetisý memlekettik ýnıversıtetiniń stýdent jastary qýanyshpen qabyldady.
– Men 4 jyl bakalavrıatta, 2 jyl magıstratýrada oqydym. Negizgi tabysym stıpendııa edi. Stýdent bolǵan kúnnen 20950 myń teńge stıpendııa aldym. Al magıstrant bolǵanda 53530 myń teńge aldym. Bul qarajat meniń kúndelikti ómir súrýime, kommýnaldyq qyzmetterdi tóleýime jetip otyrdy. Endi 3 jyl doktorantýrada oqımyn. Doktoranttardyń stıpendııasy – 82 myń. Jańa jyldan bastap bul 102500 teńge boldy. Bul degenińiz bútin bir otbasyn asyraýǵa jetetin qarajat. Sondyqtan stıpendııanyń 25 paıyzǵa óskenine qatty qýanyp otyrmyn. I.Jansúgirov atyndaǵy Jetisý memlekettik ýnıversıtetinde men sııaqty grantta oqıtyn segiz júzden astam stýdent bar. Olardyń arasynda jaqsy úlgerimi úshin joǵarylatylǵan stıpendııa alatyndary qanshama. Bilim alǵan jyldarymyzdy memleketimiz stıpendııamen qoldap otyrsa, bizge budan artyq ne kerek? Sózsiz 9 jyl boıy alǵan bilimimdi elimniń damýyna arnaımyn. Qýanyshty habarmen elimizdiń barlyq stýdentterin quttyqtaımyn jáne jetisýlyq stýdentter atynan Prezıdentke alǵys bildiremin, – deıdi 1-kýrs doktoranty Aıym Tynyshanova.
Jalpy, bilim sapasyn arttyrý men túlekterdi jumyspen qamtý maqsatynda I.Jansúgirov atyndaǵy Jetisý memlekettik ýnıversıteti keshendi jumys atqaryp keledi. Almaty oblysy agrarlyq aımaq bolǵandyqtan, óńirge qajetti mamandyqtardy zerdelep, aldaǵy 4 jylda qandaı mamandar daıarlaý qajet, qandaı bilim baǵdarlamalaryna basymdyq berý kerek ekenin anyqtap, sol boıynsha oqý baǵdarlamasy jasalady eken. Sonymen qatar jyl boıy oblystaǵy barlyq mekemelermen tyǵyz baılanys jasap, bos oryndar anyqtalady. Bul boıynsha ýnıversıtet túlekterge maǵlumat berip, mekeme basshylarymen kezdesý uıymdastyrady.
– О́z bilimgerlerin turaqty jumyspen qamtý maqsatynda Jetisý ýnıversıteti jańa bastamany qolǵa aldy. Bul bastama boıynsha, eger stýdent óndiristik tájirıbeden ótýge barǵan mekemede óziniń bilimi men qabiletin dáleldep, jumysqa ornalasýǵa múmkindik týsa, bilimgerge sońǵy kýrsty qashyqtan oqýǵa múmkindik beremiz. Bul ádis óz kezeginde, túlekti jumyspen qamtyp qana qoımaı, óz kásibi boıynsha tájirıbe jınaýyna jol ashady. Sonymen qatar ýnıversıtet «Bos oryndar jármeńkesin» ótkizý, kásiporynnyń suranysy boıynsha maman daıarlaý, vakanttyq oryndar bazasyn qurý, «Dıplommen – aýylǵa!» baǵdarlamasyna qatysý arqyly túlekterdi jumyspen qamtyp keledi. Máselen, aldyńǵy jyly ýnıversıtetti bitirgen 781 túlektiń 78 paıyzy jumysqa ornalassa, byltyrǵy kórsetkish odan da joǵary bolyp otyr, – deıdi I.Jansúgirov atyndaǵy Jetisý memlekettik ýnıversıtetiniń rektory Qýat Baımyrzaev.
Almaty oblysy
