Aımaqtar • 13 Qańtar, 2020

Qaraǵandyda 10 kósheniń ataýy ózgeretin boldy

472 retkórsetildi

Búgin Qaraǵandydaǵy «Dostyq úıinde» oblys ortalyǵyndaǵy kóshelerdiń ataýlaryn ózgertýge baılanysty qoǵamdyq tyńdaý uıymdastyryldy. Mańyzy zor sharaǵa adamnyń kóp jınalǵany sonshalyqty, olardyń kóbi 400 oryndyq negizgi zalǵa syımaı, ishte bolyp jatqan pikirtalasty syrtta turyp ekrannan tamashalady.

Kún tártibinde Qaraǵandy qalasyndaǵy 10 kósheniń ataýyn aýystyrý máselesi qaraldy. Onyń ishinde qaladaǵy basty kóshelerdiń biri – atyshýly Lenın kóshesi de bar edi. Sonymen qatar, bul tizimge Prıkanalnaıa, Krıvogýza, Zashıtnaıa, Zonalnaıa, Olımpııskaıa, Volochaevskaıa, Kývskaıa, Amanjolov syndy kósheler de kirgen bolatyn.

Jıyn barysynda zııaly qaýym ókilderi, qoǵam belsendileri jáne kóshe ataýlaryn ózgertýge qarsy toptyń músheleri de sóz alyp, pikir talastyrdy. Atap aıtqanda, belgili aqyn Serik Aqsuńqaruly, qoǵam belsendisi Aıtqoja Fazyl, tarıhshy Záýresh Saqtaǵanova ózgeristerdiń ýaqyt talaby ekenin, endi kibirtikteýdiń esh qajeti joqtyǵyn árgi-bergi tarıhtan mysaldar keltire otyryp kópshilikke jetkizdi.

Pikirtalas kezinde «Kóshe ataýlaryn aýystyrýǵa qyrýar aqsha jumsaǵansha, sol qarjyny qalanyń kem-ketigin túzeýge jumsasa bolmas pa edi?», degen syńaıdaǵy qarsy pikir aıqandar da boldy. Mundaı pikir ıelerine qarata belgili kásipker, «Nátıje» sút kompanııasynyń basshysy Erlan Áshim ataýlardy aýystyrýǵa ketetin shyǵynnyń bárin ózi basqaratyn kásiporynnyń kóterip alýǵa daıyn ekenin málimdedi.

Sonymen, qoǵamdyq tyńdaýǵa jıylǵan qaraǵandylyqtar ózgeristerdi qoldap, Lenın kóshesiniń – Abaı Qunanbaıuly, Prıkanalnaıa kóshesiniń – Saryarqa, Krıvogýza kóshesiniń – Qasym Amanjolov, Zashıtnaıa kóshesiniń – Grıgorıı Potanın, Zonalnaıa kóshesiniń – Aleksandr Zataevıch, Olımpııskaıa kóshesiniń – Narmanbet Tólepov, Volochaevskaıa kóshesiniń – Kamalı Dúısembekov, Kývskaıa kóshesiniń – Qazybek Nurjanov, Amanjolov kóshesiniń – Balqantaý jáne Nurjanov kóshesiniń Mereı kóshesi bolyp aýystyrylýyna biraýyzdan daýys berdi.

Qoǵamdyq tyńdaýdy júrgizgen Qaraǵandy qalalyq máslıhatynyń hatshysy Qudaıbergen Beksultanovtyń aıtýynsha, jıyn hattamasy qalalalyq máslıhattyń kezekten tys sessııasynda qaralyp, arnaıy sheshim qabyldanýy tıis. Odan ári ol sheshim Qaraǵandy oblystyq máslıhatynyń sessııasy men oblystyq onomastıka komıssııasynda bekitiledi. Bekitilgen sheshim respýblıkalyq komıssııanyń qaraýyna jiberilip, ol jaqtan kelisim kelgen jaǵdaıda, qorytyndy qujat BAQ-tarda jarııalanady. Iаǵnı, munyń bárine ýaqyt kerek bolady. Qalalyq máslıhattyń hatshysy qansha ýaqyt qajet bolatynyn naqty aıta almasa da, bul úderistiń mamyr aıyna deıin sozylýy múmkin degen pikir bildirdi.

Uqsas jańalyqtar