Jambyl oblysynda jumys saparymen júrgen senatorlar Muratbaı Joldasbaev, Qaırat Qojamjarov jáne Abdaly Nuralıev oblystyq kásipodaq uıymynyń múshelerimen kezdesti.
Kezdesýde ujymdyq sharttar, qyzmetkerlerdiń qaýipsizdigi, eńbekti qorǵaý, shaǵyn jáne orta bıznesti qoldaý men jalaqy máseleleri talqylandy. Parlamentshiler densaýlyq saqtaý, bilim jáne ǵylym salasyn damytýdyń 2020-2025 jyldarǵa arnalǵan memlekettik baǵdarlamalarynyń negizgi erejelerin túsindirdi.
Búginde oblystyq kásipodaqtar birlestigine 120 myńnan asa adam múshe bolyp otyr. Aımaqtaǵy 15 salalyq kásipodaq uıymdarynda 1300-den asa bastaýysh uıym jumys isteıdi.
Sonymen qatar depýtattar «Talas Investment Company» seriktestiginiń qyzmetimen de tanysty. Kásiporynda 570 adam jumys isteıdi. Olardyń negizgi bóligi – jergilikti turǵyndar. Osyndaı kezdesý Talas aýdandyq ortalyq aýrýhanasy men «Qazfosfat» zaýytynda da ótti.
* * *
Parlament Senatynyń depýtattary Nurtóre Júsip pen Dınar Nóketaeva Almaty qalasy avtobýs parkteriniń basshylarymen kezdesti.
Bul is-sharaǵa qalalyq máslıhat depýtattary men jergilikti atqarýshy organdardyń basshylary qatysty. Depýtattar kópshilikpen birge qalalyq jolaýshylar kóligi júrgizýshilerin daıarlaý, qoǵamdyq kólikke qatysty halyqtyń mádenıetin arttyrý, jol apattarynyń aldyn alý sııaqty máselelerdi keńinen talqylady.
Dınar Nóketaeva kólik mamandarynyń biliktiligin arttyrý ortalyǵynyń avtobýs júrgizýshilerin qaıta daıarlaý men kásibı sheberlikterin arttyrýǵa baǵyttalǵan jumystary mańyzdy ekenin atap ótti. Avtobýs parkteriniń basshylary oqýdan keıin júrgizýshilerdiń jumys sapasy jaqsarǵanyn, jolaýshylar tasymalyna jaýapkershilik kúsheıgenin aıtty.
Al senator Nurtóre Júsip ortalyq qyzmetkerlerin áleýmettik saqtandyrý boıynsha qabyldanǵan zańdarmen tanystyrdy. Mindetti áleýmettik medısınalyq saqtandyrýdyń negizgi prınsıpteri túsindirildi.
Almatyda 2020 jyldyń sońyna deıin 100-ge jýyq elektrobýstardy iske qosý josparlanýda.
* * *
Parlament Senaty Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Álı Bektaev Túrkistan oblysynyń Keles aýdanynda jumys babyndaǵy saparmen boldy.
Senator oblystyq jáne aýdandyq máslıhat depýtattarymen, medısına, aýyl sharýashylyǵy jáne sý sharýashylyǵy qyzmetkerlerimen, áleýmettik-mádenı sala, shaǵyn jáne orta bıznes ókilderimen kezdesip, Parlament qabyldaǵan zańdardyń negizgi erejeleri týraly habardar etti.
Kezdesýde Memleket basshysynyń Qazaqstan halqyna Joldaýynyń negizgi basymdyqtaryn iske asyrý máseleleri talqylandy. Sondaı-aq elimizde júzege asyp jatqan reformalar egjeı-tegjeıli túsindirildi.
Qatysýshylar ózderin tolǵandyrǵan máselelermen bólisip, óńirdiń áleýmettik-ekonomıkalyq damýy, bilim berý, az qamtylǵan otbasylardy qamtamasyz etý máselelerin kóterdi. Álı Bektaev barlyq ózekti másele boıynsha tıisti organdarǵa depýtattyq saýal joldanatynyn jáne jeke baqylaýyna alatynyn atap ótti.
* * *
Atyraý oblysynda birqatar kezdesý ótkizgen senator Sársenbaı Eńsegenov aldymen Prezıdent janyndaǵy Memlekettik basqarý akademııasynyń aımaqtyq fılıalynda boldy.
Jıynǵa akademııanyń jáne memlekettik qyzmet isteri agenttigi oblystyq departamenti qyzmetkerleri, oblystyq jáne qalalyq máslıhattardyń depýtattary qatysty. Senat depýtaty jınalǵan qaýymǵa Parlament qabyldaǵan zańdardy tanystyryp, halyqtyń ál-aýqatyn arttyrýǵa arnalǵan áleýmettik máselelerdi sheshý zańnyń mańyzdy aspektileri ekenin jetkizdi. Depýtatqa akademııa fılıalynyń jańa ǵımaratyndaǵy ozyq tehnologııalarmen jabdyqtalǵan oqý aýdıtorııalary kórsetildi.
Sonymen qatar Sársenbaı Eńsegenov jumys sapary barysynda Isataı aýdanyndaǵy Qamysqala aýyldyq okrýgi turǵyndarymen kezdesti. Ol is-sharaǵa qatysýshylarǵa 2019 jylǵy zań shyǵarý jumystary jóninde aıtyp berdi. Kezdesýge kelgen kásipkerler depýtatqa byltyr sharýa qojalyqtaryn sýmen qamtamasyz etý úshin sýbsıdııa berilmegenin aıtty. Osyǵan baılanysty «Qazsýshar» mekemesi sharýa qojalyqtarynyń basshylaryn sotqa berýdi kózdep otyr. Bul máseleniń oń sheshilýi úshin sharýalar depýtatqa ótinishterin bildirdi.
