Osydan 4 jyl buryn qurylyp, eshkimniń nusqaýynsyz áleýmettik jobalardy júzege asyra bastaǵan olar byltyrǵy Jastar jylynda resmı túrde tirkeýden ótti. Aýdan basshylyǵy jastardyń jumys josparymen tanysyp, olardyń áleýmettik dúken ashýyna septigin tıgizdi. Kenttegi «Ordakent» resýrstyq ortalyǵynan arnaıy bólme berdi.
Eriktiler ótken jyly óz qatarlaryn «Tazalyq tabaldyryqtan bastalady» atty 2 kúndik aksııaǵa jumyldyrdy. Naýryz merekesine oraı qaıyrymdylyq sharasyn ótkizip, talaı jannyń janyna shýaq sebetin ıgilikti is uıymdastyrdy. Tanymal aıtysker aqyn Aqmaral Leýbaeva bastamashy bolǵan «Anaǵa hat», «Ákege hat» jobalaryn Jańaqorǵanda jalǵastyrdy. Bar ýaqytyn uıaly telefonǵa telmirýmen ótkizetin jastarǵa ata-anasyna hat jazdyryp, úzdik shyqqandar aýdandyq mádenıet úıinde marapattaldy. Olarǵa tabys etilgen baǵaly syılyqtardy jergilikti kásipkerlerdi jaǵalaǵan osy erikti jastar tapty.
Jastar uıymdastyrǵan jaqsy istiń biri – baspana qıyndyǵyn tartqan otbasylarǵa asar ádisimen úı salyp berý. 2018 jyly bir otbasyna 4 bólmeli úı salyp berse, byltyr taǵy eki shańyraqty qýanyshqa bólep, olarǵa jańa úıdiń kiltin tabys etti. Kúzde taǵy bir úıdiń irgetasyn qalady, kún jylyna qurylys jalǵasady.
Jańalyqshyl jastar áleýmettik kómek suraýshylar arasynda saýaldama júrgizip, oǵan qatysqandardyń ıkemine qaraı qural-jabdyqtar alyp berip, bızneske baýlýǵa bastamashy boldy. Byltyr osy joba aıasynda 3 otbasyna tigin mashınasy, taǵy bir úıge elektr peshi, tushpara jasap, kásip bastaǵan turǵynǵa muzdatqysh satyp alyp berdi.
«Aýyldan – Olımpıadaǵa» atty joba sheńberinde óńirden shyqqan sportshylar men jastardyń kezdesýin uıymdastyrdy. Arystaǵy tótenshe jaǵdaıǵa baılanysty 12 tonna azyq-túlik, kıim-keshek pen 2 mıllıon teńge jınap, ony apat abyrjytqan aǵaıynǵa tabys etti. Eriktiler eńbegi eskerilip, Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń «Atameken» kishi jobasy aıasyndaǵy «Jomart júrek» oblystyq konkýrsynda «Jańarǵan Jańaqorǵan jastary» «Jyldyń úzdik uıymy» nomınasııasyna ıe boldy.
Bıylǵy Volonter jyly jańaqorǵandyq jastardyń jandaryna jiger, isterine serpin beredi. Osy jyly da eriktilerdiń jaqsy isteri jalǵasyn taba bermek.
QYZYLORDA
