Jarqaıyń aýdany elimizdiń astyqty ólkeleriniń biri. Jalpy alǵanda 600 myń gektardan astam egistik alqaby bar ólke úshin aýyl sharýashylyǵy damýynyń mańyzy zor. Osyǵan baılanysty Qazaqstan Respýblıkasy Parlamenti Májilisiniń depýtaty M.Temirjanov aýdan ákimi M.Balpanmen birge Derjavın qalasynynyń «Agropromtehnıka» jaýapkershiligi shekteýli seriktestiginiń májilis zalynda aýyl sharýashylyq uıymdarynyń basshylarymen kezdesti.
Kezdesý barysynda aýyl sharýashylyq salasyndaǵy ózekti máseleri talqylandy. «Aqbıdaı» JShS basshysy G.Lıýlkovıch kadr tapshylyǵyn tilge tıek etse, «OSANA-Agro» JShS basshysy I.Pýgachev aýyldarda mamandarǵa úı salý máselesi boıynsha kredıtter bólý týraly máseleni kóterdi. Aýyl sharýashylyq uıym basshylaryn taǵy bir mazalaıtyn suraq ol sýbsıdııalaý, osy suraqty «Zernotrans AE» JShS V.Vınıchýk kóterdi. Murat Barıtuly barlyq suraqtarǵa túsindirme berdi.
Budan keıin Májilis depýtaty M.Temirjanov «Hlebnaıa Nıva» jaýapkershiligi shekteýli seriktestiginiń jumysymen tanysty.
Sol kúni «Nur Otan» partııasy aýdandyq fılıalynyń qoǵamdyq qabyldaý bóliminde Qazaqstan Respýblıkasy Parlamenti Májilisiniń depýtaty Murat Temirjanov azamattardy jeke máseleleri boıynsha qabyldady. Ýálıhan aýylynyń turǵyny A.Ahmetov Petropavl-Jezqaǵan respýblıkalyq mańyzy bar joldyń Ýálıhan-Derjavın jolaralyǵyn jóndeý máselesin kóterse, K.Dýbrovın Kostychev aýylyndaǵy mobıldi baılanys joqtyǵyn aıtyp, tıisti qoldaý kórsetýdi surady.
Sondaı-aq Murat Temirjanuly «Nur Otan» partııasy júzege asyryp jatqan «Halyqqa kómek» jobasynyń aıasynda turǵyn úı kiltin alǵan kópbalaly ana Irına Kamyshovanyń páterinde bolyp, otbasynyń turmys-tirshiligimen tanysty.
