Tarıh páni boıynsha mektep oqýshylary men stýdentterdi shatastyrmaıtyn oqýlyq jazylady. Aldyn ala jasalǵan jospar boıynsha «Álem tarıhy», «Orta Azııalyq memleketter tarıhy» atty kitaptardy ǵalymdar oqyrmandar ıgiligine jaratýdy maqsat tutyp otyr. Bul jóninde málimdegen Memleket tarıhy ınstıtýtynyń dırektory Búrkitbaı Aıaǵannyń deregine súıenip, «Aıqyn» gazeti jazdy.
B. Aıaǵannyń málimdeýinshe, bul joly tarıhshylardyń tııanaqty jumys isteýine memleket tarapynan qoldaý kórsetilip otyr. Sondyqtan oqyrmandarǵa shynaıy derekti qamtyǵan tushymdy dúnıe usynylady. Instıtýt jetekshisi aıtqan málimetterge júginsek, elimizdegi 59 joǵary oqý ornynda Qazaqstan tarıhy kafedralary jumys isteýde. 4 memlekettik, 9 aksıonerlik, 9 jeke joǵary oqý oryndarynda Qazaqstan tarıhy kafedralary jańadan ashylyp, jumysqa kirisken. Tarıh mamandyǵy boıynsha joǵary bilim beretin kadrlardy daıarlaýǵa da memlekettik tapsyrys kóbeıipti. Sonymen birge, tarıh salasyndaǵy PhD doktorlaryn daıarlaýǵa artyq grant berilgen. Osyǵan oraı ult tarıhyn qaıta zerdeleýge múmkindik jasalyp otyr. Máselen, Keńes Odaǵynyń batyry atanǵan Álııa men Mánshúktiń ómirlerine qatysty biz bilmeıtin derekter aıtyla bastady.
«Mánshúk soǵysqa óz erkimen suranyp attandy. Nege? Sebebi onyń ákesi halyq jaýy retinde ustalyp, atylyp ketken. Mánshúk ákesiniń ustalǵanyn bilgen. Onyń soǵysqa qatysýy «ákemdi orys jerinen aman alyp shyǵamyn ba?» degen armanymen baılanysty bolýy múmkin. Biz Mánshúktiń erligin aıtamyz da, shyqqan tegin aıtpaımyz. Sebebi ol jaǵy áli ashylmaǵan» degen B.Aıaǵan repressııaǵa ushyraǵandardyń balalarynyń UOS kezinde soǵysqa óz erikterimen suranyp barý úrdisi bolǵanyn aıtady. Ol sonymen birge Álııanyń Moldaǵulova atanýy ákesiniń aýqatty qazaq bolýyna baılanysty degen aqtóbelik tarıhshylardyń paıymdaýyn qoldaıtynyn bildirdi. «Álııa qalaısha Lenıngradqa bardy? Álııanyń ákesi aýqatty bolǵan. Baı-kýlak retinde ustalyp ketken. Al anasyn atyp tastaǵan. Álııa naǵashy aǵasynyń qolynda ósip, sol kisiniń famılııasyn alǵan. Famılııasyn baı tuqymy dep qýdalanbasyn degen saqtyqtan aýystyrýy múmkin» deıdi Búrkitbaı Aıaǵan. Bul biz biletin qos batyr qyzymyzǵa qatysty ǵana boljam derekter. Áli syryn ishine búgip jatqan tyń derekter qanshama?!
Danııar Túımebaı.
